EDITORYAL - Nakasabot ang presidente

Miubos ang approval ratings sa duha ka mga pinakataas nga posisyon sa gobiyerno apil na ang ubang mga miyembro sa gabinete niini sa bag-ohay lang gipagawas nga Pulse Asia survey.

Sa gipagawas nga resulta sa surivey nga gihipos sugod Sept. 10 hangtud 14, 65 porsiyento sa 1,200 ka gipangutana ang nakauyon gihapon sa pagdumala ni Presidente Ferdinand Marcos Jr., gikan sa 80 percent approval rating niya niadtong Hunyo nga survey, nius-os og 15 puntos.

Samtang si Vice President Sara Duterte-Carpio nius-os sab og 11 puntos. Ang survey bisan tuod wala kini magpakita sa kinabuk-ang sentimiyento sa kapin 106 milyones ka Pilipino, dili kini mahimong balewalaon. Tungod kay sa maong populasyon nagagikan kining 1,200 ka tawo nga napangutana.

Hinuon si Marcos wala masagmuyo sa resulta kay nakasabot siya sa kalisdanan nga giatubang karon sa mga Pilipino tungatunga aning pagsige og saka sa tanang presyo sa palaliton sama sa bugas ug petrolyo.

Pun-an pa aning isyu sa confidential and intelligence fund nga dili klaro ang sumada o audit kun asa gigamit ug kun nganong hasta ang sibilyang ahensiya gigahinan man og dako nga dili man unta nila mandato ang proteksyon sa teritoryo sa nasud.

Ang Philippine Statistics Authority ning bag-o miingon nga nisaka og 6.1% ang inflation rate sa bulan sa Septiyembre 2023 tuhngod sa pagsaka sa presyo sa mga pagkaon ug kining pagsaka sab sa presyo sa transportasyon niini tungod sa kamahal sa petrolyo.

Nakahibalo ang presidente nga kinahanglan pa gyud niyang mangita og mga pamaagi aron mahatagan og alibyo ang sitwasyon karon. Una nang nipagawas og duha ka kamandoan si Marcos nga makaapektar sa presyo sa mga palaliton, kini ang Executive Order 39 ug ang Executive Order 41.

Ang EO 39 nagbutang og limitasyon sa presyo sa bugas samtang ang EO 41 nagpahunong sa LGUs pagkolekta og pass through fees sa mga trak nga nagkarga og mga produkto. Ang tumong mao ang pagpamenus sa presyo sa mga palaliton diha sa kamerkadohan. Panahon na tingaling tan-awon og balik sa presidente ang mga opisyales nga nagkulang o nagmika sa ilang trabaho.