EDITORYAL - Natulog nga magbabalaod

Nag-atubang karon ang Pilipinas og dakong suliran sa teritoryo niini partikular sa West Philippine Sea tungod sa pagpangilog sa China sa maong lugar. Walay kapasidad ang Pilipinas pagpanalipod niining maong mga teritoryo gumikan sa kakulangon niini sa halos tanang aspeto.

Bisan gani sa diplomatiko ug inamigo nga paagi, gibuhat nang tanan sa Pilipinas aron mohunong ang China sap ag-ilog ug pag-okupar sa maong mga teritoryo sud sa nakalabay nga kapin 20 ka tuig, gikan sa panahon sa Estrada administration.

Apan makapahiubos nga hangtud karon, duna pa gihapoy mga magbabalaod nga nagtuong mopatuo ang China o mosanong sa pangaliya ug pangiliyupo sa Pilipinas nga dili ilogon ang maong dapit.

Nagdamgo og buntag ang mga magbabalaod nga nagtuong kaya sa Pilipinas atbangan ang China, mas labaw ng hungog ang magbabalaod nga nagtuong walay tension sa WPS kung wala pay mag-apil apil ang mga Amerikano ug mga kaalyadong mga nasud.

Asa man diay ning maong mga magbabalaod sa nakalabay nga mga katuigan? Wala pa diay sila makakita o bisan makadungog sa mga balita? Unsa man diay ilang tan-aw anang nahitabo karon sa WPS? Dili pa ba gihapon kini angay ikalaarma?

Sa miaging administrasyon, wala kaayoy balita bahin sa WPS, walay daghang nanggawas sa media bahin sa padayong pagpanghasi sa mga Chinese ngadto sa mga mananagat nga Pilipino ug bisan sa Philippine Coastguard.

Apan dunay usa ka magbabalaod nga namahayag nga daw karon lang nakamata gikan sa lawom nga pagkatulog. Matud pa niya, sa panahon ni Duterte wala gyuy tension ug walay kasamok nahitabo tali sa Pilipinas ug sa China diha sa WPS.

Tungod niini, kombinsido siya sa iyang kaugalingon nga kaya ra sa Pilipinas sakyan ang China, ang iyang mga kaubanang magbabalaod miyam-id sa hilom.

Dili katuohan nga kining magbabalaod wala diay siya makahibalo nga gatosan ka diplomatic protest ang giduso sa Department of Foreign Affairs didto sa embahada sa China sa panahon ni Duterte?

Wala tinuod nanggawas nga balita bahin sa WPS sa panahon ni Duterte kini tungod kay walay otoridad nga gustong motingog ngadto sa mga lehitimong media. Kay lagi, dili man ganahan ang presidente sa mainstream media.