Peryante sa Calabarzon, nasusuya kay Aleng Tessie!
NASUSUYA ang kapwa n’ya peryante sa Calabarzon kay Aleng Tessie. Bakit? Kasi nga, nabili pala ni Aleng Tessie ang weekly payola ng mga perya para sa Calabarzon police. Kaya ano ang resulta? Pinataasan ni Aleng Tessie ang lingguhang intelihensiya kaya umaaray ang mga kasama n’yang peryante. Mautak si Aleng Tessie, ‘no mga kosa? Kanya-kanyang gimik lang talaga. Mismooooo! Mabobola kaya ni Aleng Tessie si Calabarzon police director Brig. Gen. Carlito Gaces? Ambot sa kanding nga may bangs!
Hindi lang ‘yan, dahil nakatali ang kamay ng mga pulis, ang ginawa pa ni Aleng Tessie ay inaagaw ang mga puwesto na sa tingin niya ay malakas ang kita. Sino ang papalag sa modus ni Aleng Tessie? Walang palag ang kapwa n’ya peryante dahil tinataasan ni Aleng Tessie ang renta ng lupa at padulas pa sa may-ari. Ang galing dumiskarte ni Aleng Tessie. Mismooooo!
Ang kaakibat ni Aleng Tessie sa raket n’ya ay itong si alyas Billy Joe, ang nanalo sa unang bidding ng lingguhang payola sa Calabarzon sa halagang P6.4 milyon weekly. Kaya lang mukhang nadisgrasya si Billy Joe dahil binawasan n’ya ng porsiyento ang pitsa kaya’t hayun, sibak s’ya. Subalit nanatili s’ya para kay Aleng Tessie. Sinabi ng mga kosa ko na police major itong si Billy Joe. Nagtatago ka pa ha? Hehehe! Ibubulong ko na lang ang tunay na name n’ya kay PNP chief Gen. Benjamin Acorda Jr., para mapremyuhan s’ya. Dipugaaaaa!
Sa tingin ko naman, imbes na kumita may tsansa na malugi itong si Aleng Tessie dahil sa “no take policy” na utos ni Acorda. Tumpak! Ipinaigting ni Acorda ang kampanya laban sa illegal gambling matapos humingi ng tulong sa kanya si PCSO General Manager Mel Robles bunga sa komokonti ang kita ng ahensiya dahil sa naglilipanang sugal lupa sa buong bansa. Araguuyyyyyy!
Dapat lang kasing dumistansiya ang mga PD at COPs sa Calabarzon kay Aleng Tessie kung ayaw nilang malasap ang nangyari sa hepe ng Orion, Bataan na sinibak sa puwesto dahil sa kapabayaan laban sa perya. Lalo na ang bagong PD ng Batangas at mga COPs kung saan naglilipana ang mga puwesto ni Aleng Tessie. Dapat silang kabahan at baka tamaan sila ng kidlat ni Acorda. Dipugaaaaa! Uubra kaya ang kinang ng pitsa ni Aleng Tessie sa “no take policy” ni Acorda?
Magsisilbing hamon naman para kay Gaces ang peryahan ni Aleng Tessie sa hurisdiksiyon n’ya. Wasakin mo Gen. Gaces ang mga lamesa ni Aleng Tessie nang sa gayon hindi ka maakusahan na iniisnab mo ang “no take policy” ni Gen. Acorda. Anong sey mo kosang Francis? Abangan!
- Latest
