Ikaunom nga pulong

Natapos Na! Consumatum Est!

Atong hunahunaon nga pila ka oras gikan karon kita mopanaw na ngadto sa laing kalibotan. Kuyog nato ang atong mga mahal sa kinabuhi nagsud-ong kanato nga nanghingutas. Sa maong panghingutas nanumbalik ang tuig o mga adlaw nga nanglabay sa atong kinabuhi ug sa atong paghanduraw sa maong mga nangagi atong nakita nga daghang mga pangandoy ug damgo ang wala mahatagi og katumanan. Daghan kita og mga laraw nga wala nato mahatagi og igong gibug-aton. Mga pulong nga buot natong ibungat kaniadto apan wala nato mahimo. Ang maong mga kasinatian daw espada nga nisamad sa atong kasingkasing ug tanlag tungod kay nakita nato nga daghan man diay kita og pagkuwang. Buot nato ang hingpit nga kinabuhi apan ang kahigayonan lakip man kita ang wala motugot niini.

Ang atong Ginoo ania hapit na mabugtoi sa iyang gininhawa. Ug sayud siya nga taliabot na ang iyang kamatayon ang nisinggit og Consumatum Est! Natapos Na! iyang katapusan? O  katapusan sa iyang Misyon? Kun maghisgot kita og Natapos Na! atong makab-ot kining mosunod nga panabut:

1.  Mahimong sabton nato kini nga katumanan sa bisan unsang gisugdan.

2.  Mahimong sabton nga nahunong ang edad o kinabuhi gumikan sa kamatayon.

Natapus man tuod ang panaw nga kalibotanon sa atong Ginoo. Apan sinugdanan kadto sa laing hugna ug anib nga panaw sa iyang pagtulon-an ang panaw sa eternidad. Ang katapusan nagpasabot  man og kahingpitan. Kahingpitan sa bisan unsang nasugdan. Sa Dios gikan ang tanan ug ang Dios mismo maoy motapos pinaagi kanatong iyang mga alagad.

Apan ang tanan dili mamahimong mahuman ni matapos kun wala ang grasya sa Dios. Ang grasya sa Dios maoy hinungdan kun nganong padayon kitang nabuhi ug nanlimbasog alang sa kahimaayaang Diosnon.

Natapos Na!

1. Ang atong paglatagaw ug pagsubay sa dalan nga nipahilayo kanato gikan sa Dios.

2. Ang atong pagluib ngadto sa Dios ug sa atong isigkaingon.

3. Ang atong kawalay pagpakabana sa uban nga nagkinahanglan sa atong pag-amoma.

4.  Ang atong pagpunay og pakasala ug paggukod sa mga kalipay nga dili tinuod.

5.  Ang atong pagka dili matinud-anon sa atong mga saad ngadto sa Dios ug sa atong mga kaigsuonan.

6. Ang atong pagsalindot sa  kamatuoran aron gakson ang bakak.

7. Ang atong pagsud-ong sa Dios ingon nga makina nga mohatag sa atong panginahanglan sa panahon nga sangpiton nato diha sa atong mga pag-ampo.

Ug labaw sa tanan ang gipangandoy natong katapusan mao man kadtong kahigayonan diin atong mahimamat ang Dios nga maoy atong sinugdan. Siya lamang ug wala nay lain pa. Amen! Ug sa atong panaw ning kalibutan kanus-a man kita makaingon nga natapos na ang atong panaw? Nasayud ba kita sa atong padulngan?