Pugante sa batas
Dapat ang nagsasalita lang sa usaping hustisya ay si Justice Secretary Boying Remulla at ang nag-iimbestigang Criminal Investigation and Detection Group (CIDG). Wala nang iba.
Kung mayroon mang ibang nagsasalita, nagpapaepal, nagpapabida lang yan.
Hinggil ito sa kasong ipinupukol kay Negros Oriental Rep. Arnie Teves na kasalukuyan pa ring nagtatago. Ayaw pa ring umuwi sa Pilipinas.
Mayroon kasing isang Cabinet secretary na hindi niya naman poder at hurikdiksyon ang Department of Justice (DOJ), kung anu-anong pinagsasabi. Pilit pinagsisiksikan ang sarili para maging laman ng balita o siya mismo ang maging balita. May pademo-demonyo pang sinasabi.
Ang nangyayari tuloy lalong gumugulo. Nagiging kumplikado kasi pilit umeentra. Ang tawag ko diyan, ASS – angkas, sakay, sawsaw. Hindi ako namemersonal at hindi ko na rin siya papangalanan.
Ito namang ibang mga nasa news media, nae-excite, nakikiliti. Bawat buka ng bibig nung utot na personaheng maepal na pilit nagpapapansin pero walang alam, pinapatulan. Lalo tuloy siyang sinasarapang magpaepal.
Singlinaw ng sikat ng araw ang paliwanag ni Secretary Remulla. Maituturing nang fugitive o pugante si Teves kapag hindi pa siya lumutang.
Bihirang gamitin ang terminolohiyang ito sa Pilipinas. Kadalasan ginagamit ito ng mga law enforcement agency sa U.S.
Ayon kay Remulla, ang isang fugitive ay suspek sa isang krimen subalit ayaw humarap o magpakita para umiwas sa batas.
Ang problema, ang inaakusahang kongresista na sinuspinde ng Kongreso noong nakaraang linggo, nagmamatigas. Ang bulong-bulungan tuloy ng ilan, dating naghahari-harian sa Negros Oriental ngayon tumiklop. Nagtatago.
Unsolicited advice, Cong. Arnie Teves, umuwi ka na. Harapin mo ang mga ibinibintang sa iyo tulad ng panawagan ng pamilya mo at ng kapatid mong dating gobernador.
Lalo lang lumalaki ang isyu hangga’t ang abogadong mong si Ferdinand Topacio ang humaharap at nagsasalita sa media. Ikaw rin mismo ang gumagawa ng dahilan para husgahan at pagpistahan ka in the court of public opinion.
Lumutang ka na. Hayaan mong ang mga nag-aakusa ang magpatunay sa hukuman. Ikaw ay dedepensa lamang. Hukuman pa rin ang magde-determina sa mga ipipresentang ebidensiya.
- Latest