Unta kaisog dili moawop

Paglingkod ni Presidente Bongbong Marcos (PBBM) sa Malakanyang, ang kaisog nga gibilin ni kanhi Pangulo Rodrigo Roa Duterte (PRRD) ngadto sa mga kamot ni PBBM, kalit lang nahanaw – wala na mabati sa katawhan.

Unsaon, ang mga opisyal nga tatak-Duterte gipang-ilisan man ni PBBM og mga Dilawan brand. Sa Bureau of Correction, si Bucor Chief General Gerald Bantag, kinsa gikahadlokan sa illegal drugs syndicates sulod sa Bilibid, gisuspendi human buhatbuhati'g mga bating pasangil ni Justice Secretary Boying Remulla ug giparelibohan dayon sa iyang tawo, Gen. Gregorio Catapang, kinsa iladong Dilawan. Resulta?

Misamot kakusog ang shabu business sulod ug gawas sa prisohan. Tulis, lugos-patay ug uban pang krimen, bisan sulod sa panimalay ug sa kadaghan tawong makakita ubos sa kahayag sa adlaw, ang mga kriminal wala nay kahadlok motira-patay sa ilang gustong patyon.

Ug mao kini nahitabo sulod sa house compound ni Negros Oriental Governor Roel Degamo, kinsa samtang malipayong mipahigayon pagtunol og 4Ps financial assistance ngadto sa iyang mga pinanggang kabos, grupo sa mga nakauniporme'g sundalo yano rang nakasulod ug walay kukaluoyng mimasaker sa mga tawong maagian paingon ngadto sa gobernador nga maoy ilang target.

Namatay ang gobernador. Ubay-ubay ang nawad-ag kinabuhi ug mas daghan ang nangaangol. Gikondenar ni PBBM ang mga kriminal. Masuk-anong nanganti nga dili siya mohunong hangtod dili masikop ang tanang mamumuno. 

Gamit ang tibuok puwersa sa kapolisan ug kasundalohan, gimandoan niya si DILG Secretary Benhur Abalos ug PNP Chief Rodolfo Azurin Jr., nga ipabuhat kutob sa unsay mahimo hangtod mahatagag hustisya ang kamatayon sa gobernador ug mga inosenting nangaangin.

Kon tutokan ang nahitabo ug tukion kinsay nagpaluyo niining mastermind, klaro kaayong gamhanan, impluwensiyado ug bilyonariyo kini, diin ultimong timbangan sa balaod mahimo niining bayran aron adto mokiling pabor niya.

Unta, dili lang kutob sa sinugdanan ang kaisog ni PBBM. Unta, sugnoran niya pirme si Azurin ug Abalos aron dili moawop ang ilang kalayo sa pagpakiggubat hangtod mahurot og kasunog kining mga dangan sa katilingban nga hagbay rang mikutlog daghang kinabuhi.

Dako kining hagit nila ni Abalos ug Azurin – ang pagpruyba, nga wala masayop si PBBM sa pagpili kanila. Buwahan, ang maot nilang imahe nga maoy nakita sa katawhan, manindot.