Adopted child

Dear Atty.Divine,

Ang akong manghud gisagop sa akong iyaan apan wa siyay adoption papers kay wa moagi sa korte ang pagsagup kaniya.

Apan sa iyang birth certificate ang nakabutang nga parents mao ang among iyaan ug ang iyang bana. Ang akong pangutana kun legal ba kining maong paagi sa pagsagop kaniya?

Aduna ba siya unyay katungod nga mo-inherit sa mga misagop kaniya? Daghang salamat.

Mel

* * *

Dear Mel,

Kun wa moagi sa korte ang pagsagop sa imong manghud, dili makonsiderar nga legal ang pag-adopt kaniya sa imong iyaan.

Kanang pagbutang sa pangan sa imong iyaan ug sa iyang bana sa birth certificate sa imong manghud isip iyang mga ginikanan kalapasan sab kana sa balaod ug mao kanay gitawag og “Simulation of Birth.”

Sa ato pa, kay wa man siya’y adoption papers then mamahimo gyud nga kwestiyonon ang iyang katungod sa pag-inherit sa kabilin sa mga nagsagop kaniya ug kay wa man siya’y adoption papers nga ikapakita  busa dili gyud siya maka-insister sa pagpangayo og  bahin.

Hinuon kun gusto gyud sa imong iyaan nga mamahimong legal ang pagsagop sa imong manghud, kinahanglan  nga mopasaka siya og petition for adoption ngadto sa korte. Thank you and God Bless.

Atty. Divine

* * *

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.