Ang katahaom sa Freedom Park nga nawagtang subli nang masaksihan

Subling masaksihan sa katawhan ang katahom sa Freedom Park sa Carbon Public Market dakbayan sa Sugbo sa sunod buwan diin gibalik kini sa naandan ug mas gipanindot pa pinaagi sa public-private partnership sa dakbayan sa Sugbo ug sa Cebu Megawide.

Kagahapong adlawa nakita nako ang dakong kausaban sa imahen sa Freedom Park itandi sa naandan nga nakit-an sukad sa akong pag-abot sa Cebu City ug sa akong pag eskwela sa USJ-R nga napuno na sa mga tindahan ang naasoy’ng park.

Niadtong nakalabay'ng mga buwan gipahigayon ang clearing operation sa mga stalls sa dapit sa tinguha nga daling mapatuman ang gitinguhang wold class Carbon Market diin misupak ang mga vendors nga nag okupar sa dapit.

Apan gipatigbabaw ni Mayor Mike Rama ang iyang political will hinungdan nga nahawanan gyud ang Freedom Park.

Tinuod daghan ang nasakitan ilabi na ang kabubut-on pero kong tan-awon nato ang resulta sa gilantaw nga kausaban nindot gyud kaayo.

Ang mga naapektohan nga nanginabuhi sa Carbon gihatagan man usab og kahigayonan nga makapadayon sa ilang panginabuhi basta mosunod lang sa mga patakaran nga gihimo sa bag-ong nagdumala aron mamahimong hapsay ug angayan nga ikapasigarbo.

Himoon nakong ehimplo ang Freedom Park nga nawagtang ang kanhi katahom tungod sa mga estraktura nga nangsulbong diha.

Apan sa hugot nga paningkamot nga mabalik ang kaanyag niini nahimo man lagi basta sinsero lang ang mga namunoan sa dakbayan.

Makita usab nato ang kamahinungdanon sa public-private partnership nga maoy nahitabo karon sa Cebu City government ug sa Megawide nga migahin og P5.5 billion sa sinugdanan apan gipadak-an kini ngadto sa 8.5 billion pesos aron mas mapanindot gyud ang proyekto.

Sa sunod buwan sa Oktobre atangan nato kong matuman ba gyud ang atong expectation nga kaanindot ug katahum sa Freedom Park.