Kahit matatanda, huwag pagkaitan ng employment
MARAMI tayong kababayang kapag nagretiro na ay nakatengga na lang sa bahay. Para bang naghihintay na lamang ng “call slip” ni kamatayan. Kaya naman maraming retirees na napapabilis ang takdang araw ng pagpanaw. Aba, malakas makapanghina ng katawan ang pagkainip kahit bata ka pa. Kumpirmado iyan ng mga eksperto.
Marami akong kakilala na kahit mahigit na sa 70-anyos ay malakas. Kaya pang gawin ang gawain ng mga nakababata. Bakit hindi sila payagang makapagtrabaho ayon sa kanilang kuwalipikasyon?
Ang kaso, dito sa atin ay may age limit ang pagtatrabaho. Madalas makakita tayo ng wanted ads na nangangailangan ng ganito o ganyang posisyon. Pero sa dulo ang anunsiyo, sinasabing kung ang edad mo ay 30-anyos na, huwag ka nang mag-apply. Akala ko ba may batas na tayo sa age discrimination?
Sa America, may kakilala ako na retiradong chief of police na nakapasok pa sa trabaho bilang security guard. Isang kamag-aral ko noon ang nagretiro sa US Navy na nakapagtrabaho pa bilang pulis sa California.
Sa Senado, mayroong isinusulong na Senate Bill 360 si Sen. Joel Villanueva. Itinatadhana na bigyan ng trabaho ang mga senior citizens na “able bodied” o may kakayahan pang maghanapbuhay. Sana maging batas ito para naman maging produktibo kundi man mapahaba ang buhay ng ating mga matatanda. Ay, kasama pala ako roon.
Sa United States, pagpasok mo sa alin mang mall, may mga sasalubong sa iyong seniors na nakangiting magsasabi sa iyo “Welcome to Macey’s”. Greeters ang tawag sa kanila. ‘Yung iba naman ay may dala-dalang tray na may bagong produktong pagkain o inuming gusto nilang ipasubok sa tao.
Sana, ganyan din tayo sa Pinas!
- Latest
