Suportahan ang pinili sa katawhan!

Wala pa man mahingpit ang proseso sa eleksiyon apan dayag na kaayo kong si kinsa ang gipili sa katawhang Pilipinhon, si Ferdinand Bongbong Marcos Jr. kinsa makita nga naglawig ang iyang kadaugan diin layo ra kaayo ang nagsunod kaniya nga si Vice President Leni Robredo.

Ingon usab niini ang sitwasyon ni Mayo Sara Duterte nga naglawig ang kadaugan batok sa nagsunod kaniya nga si Senador Kiko Pangilinan.

Sa trend karon mora’g imposible man kaayo nga mausab ang score kay dako ang labaw.

Dili ikalimod nga dunay nasakitan sa resulta kay wala mahitabo ang ilang gitinguha apan aduna usay mas daghan nga nalipay nga milampos ang ilang gitinguha.

Pana panahon ra man gud, alang sa uban walay swerte ang ilang manok samtang giswerte usab ang laing manok kay maoy nidaug.

Sa landslide ni BBM dili swerte kon dili usa ka destiny nga siya gyud ang mamahimong lider sa katawhan.

Dili man siya perpekto kay wala may tawo nga perpekto sama sa iyang mga kaatbang o kanatong tanan apan dunay hiyas si BBM nga gihuptan nga maoy nimagnet sa mga tawo nga nipili kaniya.

Kong nakita kini sa minilyon ka mga supporters, suwayan kaha pud og tan-aw sa uban aron makita kini og masabtan.

Mao kini ang angayan nga himoon aron maka-move on kay lisod kaayo mabuhi nga magpuyo sa kaligotgot kay kamo lang ang ma stress kay dili naman gyud mausab ang resulta ug mopabor sa inyong gipili.

Karon pa lang dawaton ang kamatuoran ug suportahan kinsa ang gipili sa katawhan kay tinguha man kaha nato ang kaayohan sa katawhan.

Hinuon inyo kanang kaugalingon walay magbuot kong unsay inyong himoon, kini tambag lang, basin baya og ingnon ko ani nga “let me educate you” ok ra man, dili lang pud ko bot-an kong unsa ang akong gipili, ako akong giingon sa nangagi nakong lindog nga walay bot-anay.Padayon ta sa kalamboan uban ang mga bag-on kapitan sa katong kagamhanan kay gipili kini sa katawhan.