The ‘Crying Machos’
NAGKAROON nang maraming sapantaha, haka-haka o kuru-kuro bago pa man maganap ang press conference nina Sen. Ping Lacson, Manila Mayor Isko Moreno at dating Defense Secretary Norberto Gonzales.
May nagsabing magsasanib-puwersa na ang mga ito kasama si Sen. Manny Pacquiao na hindi nakarating kahapon, upang suportahan ang isa na lamang kandidato.
Ang presscon na naganap noong Linggo ay resulta na lamang ng problema. Marami ang hindi tumingin o pumansin sa “dahilan” kung bakit nagkaroon ng nasabing presscon.
Kaya ganoon na lamang ang gulat, pagkabigla ng karamihan nang magsama-sama ang mga nabanggit na presidential candidates kasama ang kanilang mga kandidato sa pagka-bise-presidente.
Iisa ang kanilang isinisigaw at iisa ang kanilang naranasan. Gusto nilang ipaalam sa publiko na “hindi sila aatras.”
Pare-pareho silang inalok daw ng kampo ni Vice President Leni Robredo na umatras sa kandidatura bilang presidente ng Pilipinas. Babayaran na lamang daw sila o bibigyan ng “budget.”
Ikinabuwisit ito nina Lacson, Moreno, Pacquiao at Gonzales na maaaring nainsulto ang kanilang prinsipyo’t paninindigan.
Nagsalita sila para labanan ang anumang tangkang baluktutin ang totoong pagpapasya ng taumbayan at upang ipahayag na hindi sila magbibitiw.
Tama nga naman, may obligasyon sila sa kanilang mga tagasuporta na naniniwala sa prinsipyo ng kanilang partido. Ito ang pangunahing layunin ng presscon, para ipaalam sa taumbayan ang mga kaganapan at paninindigan.
Ang problema, iba na ang anggulong lumalabas ngayon sa balita, iba ang pinalalabas na dahilan ng pagsasanib-puwersa ng apat na kandidato. Nalihis na ang isyu na dahilan ng problema.
Tinawag na “crying machos” ang apat. Nagsama-sama para pagtulungan, kawawain at magkaisang paatrasin si VP Leni.
Ang hindi nila nakita, kung gaano kalaki ang balls ng mga ‘to! May bayag silang ipahayag, ibunyag, ipaalam ang tangkang pagbaluktot sa malayang pagpili ng publiko.
May nagmamanipula, pinipilit sirain at gibain ang kagustuhan ng mga tao na ihalal ang kanilang mga kandidato. Kesehodang nangunguna ‘yan sa survey, pumapangalawa o nangungulelat, ‘wag n’yong pigilan!
Itinanggi na ng kampo ni VP Leni ang panunuhol daw sa mga kandidato. Ibig bang sabihin, may ahas at hudas na pinipendeho ang kanilang sariling kandidato?!
- Latest
