Peace covenant sa election pagpakarong-ingnon lang?

Aron makaseguro nga magmalinawon ang umaabot nga eleksiyon milagda og kasabotan nga pangkalinaw o peace covenant ang mga kandidato sa lalawigan, mga dakbayan ug kalungsoran.

Kagahapong adlawa lang nagdungan ang covenant signing sa mga magpapili sa eleksiyon sa dakbayan ug lalawigan sa Sugbo kauban ang tanang mga stakeholders nga naglakip sa COMELEC, DILG, PNP, AFP giniyahan sa mga religious sector.

Akong kutloon ang gipagawas nga punto sa hepe sa kapolisan sa lalawigan sa Sugbo, Police Col.Engelbert Soriano, nga gidasonan usab sa mga kandidato nga ang peace covenant puno sa pagpakarong-ingnon kon kutob lang sa pagpirma apan dili ipakita sa buhat.

Tinuod gyud kay adunay mga kandidato nga molagda sa kasabotan ug maglamanohay ug magpalupad pa og mga puting kalapati inig ka huwan kay nagsimbolo sa kalinaw.

Kong kutob ra kini sa video ug pagpahulagway mao kini ang hyprocrisy to the highest level kay inig ka talikod na mag-isi nalang og yam-id dayon magpasegi og birada sa social media aron dauton ang kaatbang.

Mag iyahay na og pagpangdaut, hinuon mora’g dili man grabe ang ingon niini nga sitwasyon sa Sugbo, naay mga birada apan gikan sa mga followers dili sa mga kandidato.

Maayo kaayo ang katuyoan sa peace covenant kong seryosohon kini sa mga kandidato ug mga supporters. Kay kong paundayonan ang kahakog sa politikanhong ambisyon wala gyud tay padulngan, kutob ra gyud intawon sa papel nga mamahimong ibasura o sunogon.

Mahimo man seguro mangampanya nga ibase lang sa plata forma ug dili mangdaut sa kaatbang nga kandidato. Ibida ang mga plano alang sa kalamboan kay basin pa makombinser ang mga tawo nga makuha ang ilang boto.

Bisan suntok sa buwan nga dili mahitabo ang paginaslanay sa mga mahait nga pulong sa mga kandidato ilabi na niining panahon nga uso na ang social media. Apan manghinaut lang kita nga poy-an ug barugan sa mga kandidato ang ilang gipirmahan nga kasabotan aron walay gubot.