Katilingbanong tanlag

Ikatulong Domingo sa Adbiyento  (Gaudete Sunday)

Mga Pagbasa: Zep. 3;14-18/Is. 12/Fil. 4;4-7/Lk. 3;10-18

Si Juan sa iyang kapanahonan nahimong usa ka katilingbanong tanlag.

Mao bitaw nga kadto si Juan nahimong alingisig sa pandungog ni Herodes ug ni Herodias.

Nahasol baya gyud si Herodes (Antipas) sa pagpunay og hukngay ni Juan sa ilang binuhatan apan tungod kay nakita man nga usa ka tawong balaan wala gyud makahimo si Herodes sa pagpasipala ning maong propeta.

Apan gumikan sa iyang kadanghag sayud ta, napunggotan sa iyang ulo si Juan Magbubunyag aron pagpahimuot kang Hwerodias nga asawa sa iyang igsuon.

Ang gipanghatag ni Juan Magbubunyag dinhi mao ra man kadtong mga pahimangno nga makatabang aron mas mamahimong hapsay ang pagkinabuhing tawhanon.

Kuyog niini ang pagpugong sa kaugalingon ingon man ang pagkamakiangayon. Apan anaa pa ba kaha kini karong mga higayona?

Daghan kaayo kita og angayan kat-onan. Apil na niini ang sensitivity kun unsahy husto gikan sa bisan unsa nga dili husto ug maayo.

Apan kining maong mga butanga nagkawala karong mga panahona. Mas sikat ug mas dawaton ang kahiwian kaysa bisan unsang tul-id.

Mas patok pa karon ang mga hinanggaw nga mga pronouncements kaysa mga butang puno unta sa kaligdong. Lisud apan maoy matuod.

Ning taliabot nga Pasko sa pagkatawo sa atong Ginoo ang bugtong ikahalad nato mao man ang atong mahinulsolong kasingkasing ug mapaubsanong espiritu.

Ang katilingbanong tanlag maghasol unta sa mga individual nga tawo nga hangtud karon padayong nisubay sa dalan sa kangitngitan.