God’s champion

Mao kini ang mga pulong nga gidupa-printa atubangan sa gisul-ob nga puting T-shirt ni eight-division world champion Manny Pacquiao niadtong ilang panag-engkuwentro ni WBA super welterweight title holder Yordenis Ugas ibabaw sa ring sa T-Mobile arena, Las Vegas, Nevada, Agosto 21, 2021.

Makapakurat ang mensaheng gibungat sa nahisgotang mga letra. Makatandog sa dughan ug miganoy nako ngadto sa halawom kaayong pamalandong.

Alang nako, ang linalang lamang nga walay bisan gamay’ng buling sa sala ang matawag og God’s champion.

Kahinumdoman, nga Romano Katoliko ang orihinal nga relihiyon ni Manny. Kada away niya, otomatik nga moluhod siya sa iyang korner, manguros ug mag-ampo sa Kahitas-an samtang gihagkan ang mga dughan sa krusipihong nagbitay gikan sa rosaryohan nga iyang gikuwentas.

Gidungog ang mga kinasingkasing pangaliyupo ni Manny sa Ginoo. Gikan sa kakabos nahimo siyang dato ug popular. Pero, naunsa ba, nga sa kaabunda sa mga grasiyang nadawat, kalit ra man si Manny mibalhig bag-ong relihiyon?

Dili na magsul-ob og rosaryohan. Dili na kaantigong manguros. Resulta, naputol ang kutay sa sagunsong niyang pangdaog dungan sa pagkabugto sa rosaryohan nga gigunitan ni Mama Dionesia niadtong tungora.

Sa miaging kombati nila ni Ugas, ang Cuban boxer sige’g panguros. Samtang si Manny, wala! Inilog kaayo si Manny. Pero ang mapaubsanon nga Ugas maoy midaog. Miangkon si Manny nga misugmat iyang leg cramps ug maoy nakapahinay sa kapaspas sa iyang foot works. Mipadayag, nga sa tanang kontra niyang naagian, si Ugas ang kinasayonang pildehon. Pero, nganong maoy midaog? Daw dili siya makatuo.

Busa, luyo sa mga nagtipun-og kampeyonatong bakos nga lisod nang matupngan, gusto siyang mapun-an pa kini. Busa, nagtinguhang makig-rematch ni Ugas. Kuno, dili tungod sa kuwarta.

Kondili, matud niya: “Boxing is my passion.” Tinuod kahang wala siya mag-agap sa kuwarta? Nagplano baya siya nga molansar pagka-presidente sa Pilipinas, diin ang kuwarta gamhanan kaayo?

Kon dili pa moretiro si Manny sa pamoksing ug dili mobiya sa hugaw’ng dula sa politika, dili g’yud siya mahimong God’s champion sumala sa nahisulat-pasiatab sa iyang T-shirt. Ngano?

Kay kadto lamang tawo, kinsa kanunay’ng nagtuman sa tanang sugo sa Ginoo diha sa iyang pagpangalagad sa isig ka ingon ang giilang kampeyon sa mga mata sa Diyos.