Puasa gihapon si Juan

Ang PDP-Laban national council misagop sa usa ka resolusyon nga nag-awhag kang Presidente Duterte nga modagan pagka bise presidente karon umaabot nga eleksyon sa Mayo 2022 sa tuyo nga mapadayon ang mga ekonomikanhong polisiya nga nasugdan sa iyang termino. Lutaw ang pagka politiko ug ang tinuod nga motibo ni’ng gibuhat sa PDP-Laban.  Haum ang panultihon nga “Ang politiko naglantaw lamang sa mosunod nga eleksyon, samtang ang estadista (statesman) naglantaw sa mosunod nga henerasyon”.  Puasa gihapon ang katawhan! Faeetz!

Kandidato unta’y gihatag

Matud ni Chief Presidential Legal Counsel Salvador Panelo, ang kasungian diha sa West Philippine Sea, nga giingon sa opposition nga giyamayamaan ni Presidente Duterte, dili mahimong isyu sa katawhan atol sa eleksiyon karong 2022. Alang kang Panelo, ang mahimong isyu mao ang hisgutanan sa bakuna ug kadtong mga butang nga makasalbar sa kinabuhi.  Mahimo’ng sakto si Panelo.  Matag eleksyon, kwarta ang labing dakong hisgutanan. Kon atong palandongan, basin baya dili buot ang Kahitas-an nga adunay eleksiyon nga pagabuhaton.  Kay kon buot pa, gihatagan unta kita niya’g mga kandidato, inay mga disipulo.  Baya no!

Kuyogan sa ginikanan

Supak gihapon ang Malacañang sa sugyot nga pagawason na sa ilang panimalay kadtong nabakunahan na nga mga senior citizens. Matud pa ni Secretary Roque, unya na pagawason ang mga senior citizens kon makab-ot na sa Pilipinas ang giingon nga “population protection” batok sa COVID-19.  Dili hinoon hingpit ang maong pagdili kay gitugotan man ang mga senior citizen paggawas aron mopalit sa ilang kinahanglon. Labaw’ng dili tinuod ang giingon nga mahimo lamang nga mosuroy ug mogawas sa panimalay ang mga senior citizens kon kuyogan sila sa ilang mga ginikanan.  Pagkatoytoy!

Dakpon pag-una si kap

Mipasidaan ang Cebu City Police Office sa mga barangay kapitan nga unahon sila pagdakop kon mapakyas sila pag-supervise sa bisan unsang matang sa panagtapok diha sa ilang barangay.  Ang maong pasidaan gihimo agi’g tubag sa mando sa Presidente.  Sinapat ang maong pasidaan.  Prisohon ang kapitan sa sala nga nabuhat ni Pedro, Maria ug Juan.  Na hala Kap, kalimti lang una ang imong ubang mas mahinungdanon pa unta nga katungdanan ug gimbuhaton.  Bitbita na ang imong ulisi ug pagpunay na’g suroysuroy sa imong barangay aron badlongon ang magtapok. Madahaan!

“Komon sin” ang gikinahanglan

Gilagdaan na sa DOJ ug DILG ang internal guidelines alang sa mga law enforcers ug ubang ahensya sa kagamhanan nga nagpahamtang og silot sa mga nakasupak sa health protocols.  Dili igo nga umolon ug lagdaan lang ang internal guidelines.  Angay usab kini’ng masabtan pag-ayo sa tigpatuman sa maong lagda.  Daghang pagpangdakop nga kwestyonable tungod kay ang gitahasan sa pagpatuman walay kabangkaagan.  Matud pa sa akong silingan nga drayber sa trisikad, “angayan usab nga adunay “komon sin” (common sense) ang tigpatuman aron tunhay ang katilingban”.  Owrayt!