Sala bang manaway sa paring nakasala?

Sagrado ang pari. Kay ang Ginoo maoy gipakaslan sa adlaw nga siya giordinahan sa obispo atubangan sa altar.

Sa laktod, ang pari nagpresentar sa Ginoo. Ang Ginoo mismo maoy mipili niya pinaagi sa usa ka tulokibong tawag diha sa damgo o misteryosong hitabo.

Niining bag-o, gumikan sa makapuling talan-awon nga nag-viral sa social media, diin gipakita sa video ang tumang kasuko sa amahan ug mga anak ngadto sa pari, kinsa giakusahan nga nanapaw, daghang netizens ang nakapanaway.

May mga siaw pang mipaabot niini ngadto ni Presidente Rodrigo Duterte aron sugnoran ang kasuko niini ngadto sa kaparian nga hagbay rang nagdilaab daan. Husto ba ilang gibuhat?

Unta, kon molabay ta’g bato sa pari, mas maayong tan-awon daan ang atong kaugalingon kon limpiyo ba sab ta?

Tangtangon usa ang trosong nakaali sa atong mga mata aron makita nato ang tin-awng kamatuoran: Nga ang pari sama nato, tawo ra pod.

May higayong matental sab pagkaon sa gidiling bungang gihungit sa bitin.

Angay hinumdoman. Ang pari nagpresentar sa Ginoo. Kon ato siyang pakaulawan, dagmalan sa pulong ug sa buhat, sama ra nga ang Diyos maoy gibuhatan nato sa ingon.

Gani, dihang batoon na unta sa katawhan ang babayeng mananapaw, mibarog si Hesus ug miingon: “Mounag bato ang walay sala ninyo.”  Ug unsay nahitabo? Naulaw ang tanan ug hinayhinayng mitalikod palayo.

Unya, niining paring nabiktima sa pagpakasala, nagpungasi ang nagkalainlaing bato nga miguba pagsamot sa iyang imahe ug miguhayguhay sa nagkalapok niyang puting sotana? Dili ba, ang pari, igsuon pod nato? Nan, ning iyang pagkalukapa, ato siyang tabangan nga makabarog. Nungkang, tiwasan!

May pipila, nanukmat: “As a priest, he must practice what he preached! He should have set a good example.” Ug mipasangil sa pari nga maoy hinungdan nganong dili na sila ganahang mosimba. Timaan, nga dili sila makapasaylo sa nabuhat niini.

Pangutana: “Sala ba ang manaway sa paring nakasala?” Aw, oo, uy! Dakong sala. Labi na niadtong dili makapasaylo. Kay imbes tambalan ang samad. Gibukiki pa!

Sa Mateo 6:14-15, si Hesus miklaro: “Kay kon inyong pasayloon ang nakasala ninyo, pasayloon pod mo sa Amahan sa langit. Kon dili, nan, dili sab mo pasayloon sa Amahan.”