Misiaw hinuon

Human si Mayor Edgardo Labella mimando sa kapolisan nga paspasan ang paghimo’g kampanya batok sa illegal nga sugalan, sama sa illegal swertres, mikatap na man hinuon pag-ayo.

Ang gipasabot nako mao kanang yellow nga kahon-kahon nga mora’g kartolina nga gihimong ticket book sa mga nagpasiugda og illegal swertres.

Ayaw ko’g ingna nga si Koronel Josefino Ligan nga maoy direktor sa Cebu City Police Office (CCPO) ug ang kadagkoan sa Police Regional Office (PRO)-7 wa makakita niini.

Mga amigo nako nga nagtrabaho sa GMA-7, mitug-an nga midaghan na man hinuon ang mga yellow ticket booth nga anaa sa daplin sa GMA-7 Road gikan sa Busay Barangay Hall?

Giingnan ko sa mga amigo nako sa GMA-7 nga nakadungog sila nga iladong tawo ang nagpaluyo sa maong mga sugalan. Aw mao diay tingali nga wa kini hilabti, ug posible sab nga ang mga polis nakasapi niini.

* * *

Akong balikon nga sayon ra kaayo ang pag-ila sa mga illegal outlets sa Swertres ug sa gitawag og Small Town Lottery (STL).

Ang legitimate outlets sa Swertres, konektado sila sa Pagcor ug ang mga STL outlets konektado sa Philippine Charity Sweepstakes Office. Nagpasabot nga ang ilang mga ticket booth, dunay connection paingon sa Pagcor ug PCSO.

Kon mopalit ka og ticket o number combinations, hatagan ka og ticket nga gikan sa machine ug ang halin registered sa Pagcor/PCSO. Gihimo ba gud na? Wa mo makabantay nga gisuwat ra sa kamot sa mga nagbantay sa booth ang numero nga inyong gipustaan? Mao kana ang timailhan nga illegal ang operation sa maong mga nagpadagan sa maong sugalan kay ang halin nila dili makakuha og buhis ang atong kagamhanan. Kon tinud-on sa atong kapolisan ang pagpangsakmit niini, sayon ra gyud.

Unya, pangdakpon ang mga tawo nga nagbantay sa booth, ug iapil nga pasakaan og kaso ang mga tawo nga ilang itug-an nga nagbutang kanila diha.

Timan-i nga dunay balaod nga nagpadako sa silot sa mga illegal nga sugal nga naglambigit og illegal numbers game.

* * *

Kadtong gustong motambong sa misa nga ipahigayon atol sa pagsaulog sa ika-500 ka tuig nga Kristiyanismo sa nasud ugmang adlawa, diha na lang mo sa inyong balay ug tan-aw na lang sa mga live sa lainlaing media outlets.

Pipila ra ang tugotan nga makatambong sa misa, ug kadtong magdala og sakyanan, ibilin ninyo sa layo kaayo nga dapit kay dili pasudlan og mga sakyanan ang palibot sa Basilica del Santo Niño.

Ang kalihokan maoy pagsaulog sa unang bunyag sa mga Kastila nga Pari. Ang una nilang gibunyagan mao sila si Hari Hubaon ug Rayna Juana, nga hari sa Sugbo kaniadto.