Mag-ampo lang ta

Kanselado ang kalihokan sa mga simbahan niadtong Semana Santa tungod sa pagsiaw gihapon sa Coronavirus Disease dinhi sa atong nasud.

Tungod sa COVID, duha na ka tuig nga kanselado ang kalihokan sa simbahan atol sa Semana Santa. Aw, hinuon, ang paghandom nato sa pagpasakit sa atong Ginoong Hesus, mahandom man nato bisan wa ang kalihokan sa simbahan.

Apan lahi ra gyud kaayo kon anaa unta ang kalihokan sa simbahan, ilabi na atol sa Biyernes Santo, nga handumon nato ang pagkamatay sa atong Ginoong Hesus.

Atong iampo ug ipangaliya sa Kahitas-an nga mahanaw na gyud unta sa hingpit ang coronavirus nga naghatag og dakong problema sa katawhan sa kalibotan.

* * *

Didto sa Manila, gibalik pagpahimutang ubos sa Enhanced Community Quarantine (ECQ) ang mga dapit didto, apil ang silingan mga mga siyudad ug probinsya nga taas kaayo ang mga kaso sa COVID-19. Ambot kaha dinhi sa Dakbayan sa Sugbo. Gikuyawan ko nga basin og mahukman sa Inter-Agency Task Force (IATF) nga ibalik sa ECQ ang Dakbayan sa Sugbo, daghan na unya ang magkalisudlisod. Para kanako, dili lang unta ibalik sa ECQ ang siyudad kay luoy kaayo ang katawhan.

Magkagot gyud ang akong bag-ong sa kalagot kon magtan-aw ko sa mga tawo nga dili mag-mask ug magpundok-pundok sa publikong lugar.

Nakaingon ko nga sus, kon polis pa ko, pangdakpon nako kining maong mga tawhana tungod sa paglapas sa gimando basi sa balaod. Ang uban sab, moingon nga dili tinuod nga misaka ang mga kaso sa COVID-19 karon, ug gihimohimo lang kini sa kadagkoan sa kagamhanan aron sila makakwarta.

Unsay makakwarta nga wa na man gani kwarta ang kagamhanan. Kon maghisgot ta og nasud, ang Pilipinas nakapanghuwam na man gani aron gastohon nga matubag ang panginahanglan sa katawhan atol sa lockdown.

Kon dili kamo motuo nga dunay COVID-19, dawata ang akong hagit nga sulod mo sa ward sa ospital nga anaa ang mga pasyente nga natakboyan og COVID-19, ug kay dili man kamo mahadlok, hala, gaksa sila.

Gawas nga inyong gakson, ayaw pagsul-ob og mask nga makisulti sa mga COVID-19 patients, unya pakigdikit gyud kanila. Tan-awon nato kon isog ba gyud mo ug dili ba motuo og COVID-19. Ang nakadadt gud kay kon makadungog mo og estorya sa uban, ilabi na dakong opisyal sa kagamhanan, inyo man sab dayong sundon. Pastilan ninyo.