Kahulogan sa Ash Wednesday
Nagkadaghan ang natakboyag COVID-19 kada adlaw.
Dinhi lang sa siyudad sa Sugbo, giuran-uran lang ang three digits nga numero sa nangataptan.
Adunay nangaayo. Naa poy nangamatay. Ang pait, kay ang namatay ipa-cremate dayon ug dili na gani mahikap sa mga tagtungod ang ilang haya.
Nilang nangamatay sa COVID-19, nakahigayon kaha sila pagsangpit sa Ginoo ug nakapangayog pasaylo sa tanang sala sa wala pa mabugtoi sa ilang ginhawa?
Niadtong Ash Wednesday, misimba ko sa Redemptorist Church pagka alas 3:30 sa hapon, diin napuno man tuod ang parking area sa mga nanimbahay, pero hugtanong gisunod ug gipasunod ang unsay nalatid sa health protocols.
Kanunay kining gisingit-pahinumdom sa pari ug lector, labi na sa yugto nga sugdan ang pagpanghulog og abo sa alimpulo o kanhi, pagpamadlis sa agtang.
Simple ra ang homiliya ni Fr. Nono Reteracion, CSsr. Apan bug-at. Niya pa, panahon sa kuwaresma, adunay daghang mangutana: “Unsa man ang dili angay buhaton?”
Iyang tubag: “Usahay, moingon ko, hikalimti na lay unsay angay buhaton. Paninguha nga mahimo kang maayong tawo. Example: Tungod kay nagpuasa, tungod kay gutom, tungod kay nag-absteninsiya, ang anak moduol nimo ug moingon: “Pa o Ma, aduna unta koy tuyo nimo.”
“Unya moingon ka: Saba, diha! Gutom ra ba ko, kaonon ta ka karon! Aw, wa na, guba na imong pagpuasa!”
Sa 8:30am Ash Wednesday on-line mass sab ni Fr. Martin Tobin, kini mipasabot unsay kahulogan sa abong ibadlis sa agtang:
“The ashes are sign that you acknowledge, you are a sinner. The ashes are for people who are humble, who acknowledge that they are sinners and who want to change.”
“Those are the two meanings of the ashes. An acknowledgement that I am a sinner and secondly, a commitment I’m making to fight against sins…not to allow sins rule in my life.”
Ning panahon nga kalit mamatay ang tawo tungod sa COVID-19, kinahanglan unta nga sundon nato ang mga giya nga gitanyag sa duha ka pari diha sa ilang homiliya.
Kay mga giya kini nga makaabli sa ganghaan sa langit oras nga tawagon na kita sa Ginoo.
Apan pipila lang ba ang nagpabadlis sa ilang agtang niadtong Ash Wednesday aron modawat niini?
- Latest
