EDITORYAL - Pagpili og bakuna

Ang ubang mga local government units namahayag nga nagplano silang mopalit og kaugalingong brand sa coronavirus vaccine ug dili lang magsalig sa bakunang libreng ihatag sa nasudnong kagamhanan.

Usa sa mga LGUs nga mopalit og kaugalingong bakuna mao ang Cebu City. Kini bisan pa og uwahing namahayag si Mayor Edgardo Labella bahin sa plano.

Sumala pa sa mayor dili niya ipamugos sa mga Sugboanon ang Sinovac kini kun mao kini ang gisaad nga bakuna para sa siyudad.

Hinuon wala pay klarong brand kun Sinovac ba gyud ang gitagana para sa Cebu City, apan kun basehan ang mga nahaunang pamahayag sa mga opiyales sa gobiyerno daw mao gyud kini ang brand.

Ang siyudad usa sa prayoridad sa bakuna tungod kay usa kini sa dunay labing daghan og mga kaso sa COVID-19.

Maayo nga dunay opsiyon ang taga Cebu City para niini.

Si Labella miingon nga ilang tukion ang bahin sa bakunang paliton kay di kinahanglang ang bakunang gitagana sa national government ra gyud ug wa nay kapilian ang iyang mga konstituwente.

Husto kining gihimo ni Labella kay sa kadaghan sa mga nanghitabo karon tungod sa pandemiya, dili kalikayan nga dunay daghang namolitika lang gihapon.

Pinaagi aning desisyon ni Labella, makita sab sa nasudnong kagamhanan nga ang Cebu City kayang mangita og paagi ug gawasnon kini sa impluwensiya sa mga politika sa kaulohan.