EDITORYAL - Pagkaluoy sa garbage collectors

Pagkaluoy sa mga garbage collectors nunot sa mga basurang mga surgical mask ug facemask nga ilang mahipos kada adlaw. Dili kini gikan sa mga tambalanan kondili diha mismo sa kadalanan ug sa mga balay-balay.

Karong panahon sa COVID-19 pandemic, tanang tawo gimandoan sa pagsuot kanunay og face mask agi og proteksyon aron dili matakboyan sa maong sakit.

Apan daw walay impormasyon ang katawhan nga ang mga face mask o surgical mask o bisan kanang mga binuhat nga facemask dunay espesyal nga paagi sa pagdispatsar kun dili na gamiton. Kini tungod kay posible nga nagdala sab kini og kagaw o virus. Dili kinahanglang COVID-19 gyud kondili uban pang makatakod nga mga sakit sama sa Hepatitis.

Base sa balaod, ang basurang gikan sa mga tambalanan, laboratoryo o klinika trataron kini nga peligrosong matang sa basura.  Tungod kay posibleng duna kini infectious disease, toxic, radioactive, chemical ug makasamad o makatusok.

Apan kay lahi naman karong panahona tungod sa pandemic, ang mga tawo magsuot naman pirme ug facemask ug way nasayod kun ang uban kanila dunay makatakod nga sakit dili lang COVID-19.

Mao nga kining mga facemask angay sab untang konsiderahon nga dili ordinaryong mga basura. Apan kay tanang tawo nagsuot naman niini, dako kining problema kay kaning tigkolekta og hospital waste mga pribado kining kompanya nga accredited sa DOH.

Dili raba tanang garbage collectors sa mga barangay ug sa siyudad nabansay og maayo bahin sa mga hazardous waste ug menus sab kaayo kanila ang nagsunod o natudloan bahin sa environment and health occupational hazards.

Makita gani nga ang uban, ordinaryo ra kaayo og gisuot, way personal protective equipment sama sa gloves, mask, goggles ug safety boots isip proteksyon.

Apan kang kinsa man kini nga tulobagon? Tulobagon kini sa barangay ug sa local government units kay sila maoy pinakauna untang mosiguro sa kaluwasan sa mga kawani niini. Responsibilidad sa LGUs apil na sa barangay nga mogasto aron bansayon ang mga garbage collectors bahin sa paghipos sa facemask ug pagpagamit gyud kanila og PPEs isip last line of defense.