Me Nistry

Mao ni kasagaran ang gipahimangno ni Papa Francisco ngadto sa iyang kaparian nga unta kun mahimo isangyaw gyud si Kristo dili ang kaugalingon lamang.  Apan sa mosugot kita o sa dili dunay mga higayon nga mas mapadayag pa man nuon ang kaugalingon kaysa Ginoo.

Kini dili tungod kay ang uban gituyo (o basin pud) kondili tungod kay diha sa pagkatawhanon dili ikalimod nga mamahimong example ang kaugalingon.

Ang nakalisud lang niini, kun ugaling himoong sanglitanan ang kaugalingon, mahimong ang kaugalingon usab himoong sukaranan alang sa ubang mga gimbuhaton. Butang nga nga makapalain sa kadaghanan kanila nga sakop sa panon.

Duna koy nakaila nangutana nako kun unsay plano nako sa kinabuhi. Ako siyang giingnan nga enjoy na lang ko sa gimbuhaton karon.

Natingala siya kay alang niya angayan kuno nga mamahimong kumbate pa gyud kuno diha sa paningkamot alang as parasan sa Ginoo. Kinahanglan dunay ikapakita ngadto sa uban sa labok nga gikahinaman.

Ako siyang giingnan nga sa akong pangedaron nga 41 wala naman tingali angayan nga ihambog pa kay haduol na ang adlaw sa pagpanudya.

Ang maayong buhaton mao ang pag-enjoy ug sa  laing bahin ang pagkahimong mamugnaon karong mga panahona aron malipay pud dili lang hingtungdan kondili ang tanan, butang nga nakapayamiid sa iyang bitay nga ngabil.

Adunay pipila ka punto:

1. Angayan lamang nga angkonon nato nga dili kita mga superman busa dunay limitasyon.

2. I enjoy ang kasamtangan ug kalipay sa bisan unsa nga idalit sa kahigayonan kay kini maoy sukaranan sa kinabuhing kontento ug malinawon.

3. Ayaw itandi ang  kaugalingon ngadto sa uban. Kay ang pagtandi maoy magdala og suliran ug kasakitan.

4. pagpaubos ug pagpasalamat kay dili tanang tawo ang gihatagan og linain nga k ahigayonan sa pagpangalagad sa Dios sa  mas espesyal nga paagi.

5. Ang mahinungdanon malipay ka sa imong gibuhat karon. the rest will follow matud pa.

Sa akong pagsuhid sa akong kasinatian, daghan  kaayo og angayang ipasalamat sa kahitas-an.

Tinuod sama sa uban duna sab koy pangandoy apan ang maong pangandoy mahimo naman diay gambalayon bisan diha sa mamingaw nga lapyahan sa atong handurawan.

Ang tanan mahimong biyaan ug talikdan. Ang mahinungdanon mao nga nindot ang atong pakighimamat sa atong isig kaingon nga bisan sa mas yanong paagi sila nakasinati kun sa unsang paagi sila gipangga sa Dios pinaagi kanato.

Mas mahinungdanon ang katawhan kaysa bisan unsang kalampusan.