EDITORYAL - Single-use plastic

Karon nga Sinulog 2020, masukod kun duna ba gyuy nakat-unan ang publiko bahin sa kampanya sa gobiyerno ug mga nagkadaiyang non-government organizations kabahin sa pag-atiman sa natong kalikopan.

Onse ka toneladang basura ang nahipos sa City Environment and Natural Resoruces Office sa miaging Sinulog.

Klase -klaseng basurang plastic gikan sa mga tawo ug sa mismong mga contingents sa ilang props, bottled water ug styrofoam nga sudlanan sa pagkaon. Usa sa mga problema sukad pa kaniadto mao ang disiplina sa mga tawo.

Kanang kinaiyang way pagpakabana kay karon dili pa man sila maoy direktang naapektahan sa basurang ilang gilabay karon.

Kun nabatasan na sa tawo ang paghipos sa ilang ginagmay nga mga basura ug pagpakabana sa kalikopan ug sa ugma sa kalibutan, wa gyud untay basurang magpasad.

Ang single-use plastic maoy nakapadaghan sa basurang plastik nga anuron padung sa dagat.

Dugay mahilis ug ang uban makaon sa mga mananap sa dagat.

Nasuta sab sa pagtuon sa mga siyentipiko nga kadtong mga plastic nga gituohang nahilis na, wala man diay mahilis kundili nabungkag ra ug napulbos.

Kaning mga napulbos nga basurang plastic wa man tuod makaon sa mga dagkong isda samtang naglutaw pa sa dagat, ang mga gagmayng isda o mga semilya maoy makakaon.

Ang mga local government units dako kaayo og papel pagpakgang niini nga polusyon pinaagi sa pagpanday og mga ordinansa ug estriktong pagpatuman niini.

Karon nga Sinulog 2020, masukod kun duna ba gyuy nakat- unan ang publiko bahin sa kampanya sa gobiyerno ug mga nagkadaiyang non-government organizations bahin sa natinga na natong kalikopan.