2020 na, bakbakan na naman sa mga patay-patay!
Nakahanda na ang listahan ng BITAG ng mga tatrabahuhin namin ngayong taong 2020.
Salamat sa katatapos lamang na selebrasyon ng Pasko at Bagong Taon. Naging pagkakataon ito upang makapag-isip at makapaghanda ang aming grupo ng mga bagong taktika’t pamamaraan ng pagtulong sa kapwa.
Lalo’t may mga naiwan kaming trabaho na dapat kinastigo na ng BITAG noon pang 2019. Dahil may okasyon, nagmenor muna kami’t nagbigay ng pagkakataon sa mga awtoridad na tinawagan namin ng pansin.
Pero taong 2020 na at ikalawang linggo na ng taon, tapos na ang bakasyon at hibernation. Oras na para gisingin ang mga natutulog sa pansitan.
Una sa listahan ng BITAG ang red plate vehicle na naaktuhan ng mga BITAG night strikers na namimick-up sa Quezon Ave. Nasundan namin ito hanggang sa hotel na pinag-check-inan.
Kumatok na kami sa ahensiya ng gobyerno kung kanino nakapangalan ito. Pero hindi maganda ang sagot ng tanggapang ito sa amin, sounds like its no big deal to them at tila walang pakialam.
Eto pa, may isang mayor na nagbigay ng babala sa mga dayuhang employer sa kanilang siyudad. Hinggil ito sa pananamantala’t pagtrato ng hindi maganda sa mga manggagawang Pilipino.
May inilapit kaming trabaho sa inyo hinggil diyan. Pero hirap na namang magbigay ng schedule na humarap ang mayor n’yo.
Ilan lang ito sa malalaking tatrabahuhin ng BITAG ngayong 2020, babalikan ko kayo ngayon.
Marunong kaming sumunod sa polisiya na sumulat, tumawag, humingi ng appointment pero kung ito ang paraan n’yo para isnabin ang mga inilalapit sa inyo para kusang mamatay ang isyu, nagkakamali kayo.
Ngayong 2020, itigil n’yo na ang burukrasya sa mga ahensiya ng gobyerno na kinakailangan pang magpadala ng pormal na liham, humingi muna ng “appointment” at mag-aantay ng ilang araw para tugunan ang mga reklamo.
Maraming maliliit na kababayan nating humihingi ng tulong ang naging biktima ng burukrasyang ito.
Maging kami, ang T3-Tulfo Brothers nabiktima na ng mga taong hinalal o binigyan ng posisyon sa gobyerno na nagtatayngang kawali sa mga humihingi ng tulong.
Huwag n’yo na kasing gamitin sa pulitika ang kahirapan, kahinaan at pangangailangan ng mga pobreng kababayan natin.
Kaya dalangin namin sa BITAG na maging malikhain at laliman pa ng ating pamahalaan ang kanilang sistema’t pagtulong sa mga nangangailangan.
Eto ang hamong kakaharapin ng BITAG ngayong taong 2020. Nawa’y hindi na kailangan pa ng bruskuhan at gibaan para masolusyunan ang isang reklamo.
Pero kung talagang ayaw magpadala sa maayos at magandang usapan at patay malisya pa rin sa dapat aksiyunang problema, bakbakan na ‘yan!
- Latest