English Only Please!

Mao kini ang akong mahinumduman sa akong mga magtutudlo sukad sa elementarya ug high school nga partikular kaayo sa paggamit sa pinulongan nga ininglis aron kuno mabaid ang mga tinon-an sa pag estorya ug pagsabot sa naasoyng pulong.

Gani multahan man mi og moestorya og binisiya, 25 sentimos kada pulong nga malitok aron gyud mapugos og ininglis. Dako pud baya og natampo kining maong sistema kaniadto nga ang english mao ang medium of instruction kay bisan og dili gyud ko ko haniti sa pulong apan makahibawo man sad ko moestorya og ininglis, credit sa akong mga magtutudlo kaniadto. Apan sa bag-ong sistema sa K-12 gihatagan man og dakong bili o prayoridad ang atong kaugalingong pulong nga gitawag og mother tongue.

Kung wala ko masayop gikan sa preschool hangtod sa grade 3 ang mother tongue dinhi sa Sugbo nga binisiya ang gigamit nga medium.

Wala man ko kasuway niini apan sa akong nadunggan maproblema gyud intawon ang mga bata labaw na ang mga ginikanan sa mga pulong nga gigamit ilabi na sa math ug ubang subjects nga lisod kaayo ang translation gikan sa english ngadto sa bisaya. Maayo man kini kay mabansay ang mga bata sa paggamit sa kaugalingon natong dila.

Apan disbentaha kini kun naanad na sila nga magbinisaya kay inig abot sa level nga gikinahanglan na nila mag ininglis maglisod na sa sila og adjust.

Ang resulta hinay sa english ang mga tinun-an kay mao pa man ang ilang pagsugod ug pagkat-on.

Ang pagbinisaya unta sa balay kini kauban ang mga ginikanan ug ubang mga tawo sa komunidad ug ang english sa eskwelahan matod ni Gov. Garcia.

Dili man kuno mawagtang ang patriotism sa mga bata kun magkat-on og ininglis sa tunghaan.

Kini ang argumento sa governor sa lakang niini nga ibalik ang english isip major medium of instruction.

Ang mga Koreano ug ubang nasod moanhi pa sa Pilipinas kay moeskwela og ininglis kay maayo kuno kitang mga Pinoy.

Apan kita misibog man nga daw gipadaplin ang kahigayonan nga mabansay ang bata sa ininglis nga maoy edge nato sa ubang nasod.

Anugon nga basin og sa pagpadaplin sa english language inanay nga mawagtang kining abilidad nga motabi gamit ang naasoung pulong. Ambot lang kun mapatuman ba kini kay matud sa DEPED nga kinahanglang adunay amendment sa kongreso kay ang kasamtangan nga sistema nahimo namang usa ka balaod.