Pulahan, huwag paniwalaan

NILALASON ng mga maka-Kaliwa ang utak ng taumbayan para magrebelde sa pamahalaan. Ikinakalat nila na pinabayaan ng administrasyong Duterte ang mga magsasaka at mangingisda sa nakalipas ng tatlong taon ng kanyang panunungkulan. Pinapaniwala nila ang mga mag­sasaka na sila’y inilulugmok ng pamahalaan sa kahi­rapan at ibinabaon sa utang. 

Ngunit, ang katotohanan, umabot na sa P73.5-B ang pondo na inilaan sa Agri-fishery sector sa unang 100-araw ni William Dar bilang bagong kalihim ng Department of Agri­culture, noong Agosto 5, nitong taon.

Ang budget ng DA sa taon ito ay umabot lamang ng P64.1-B lamang pero nakalikom ng pandagdag na pondo si Dar para agad matulungan ang sektor ng sakahan. Ang pondo ay inilalaan sa maagap na pagtugon sa dala­wang isyu: ang Rice Tariffication Law (RTL) at ang African Swine Fever (ASF).

Ang buong P10-B para sa pagpapatupad ng Rice Competitiveness Enhancement Program (RCEP) ay inila­laang tulong pinansiyal upang gawing mas competitive ang mga magsasaka laban sa negatibong epekto ng RTL. Naglaan din ang gobyerno ng P3 billion para sa unconditional cash transfer program sa 600,000 magsasaka ng bigas.

Halos P2.5 bilyon ang inilaan para sa Expanded Survival and Recovery Assistance Program para sa Rice Farmers (SURE Aid Program) na nagtatanim ng isang ek­tarya o mas kaunti sa lupang sakahan.

Isa pang P7-B ang inilalaan sa National Food Autho­rity (NFA) upang makakuha ng direkta mula sa mga mag­sa­­saka, alinsunod sa programa ng seguridad sa pagkain ng gob­yerno. “Sa halagang P7-bilyong badyet na ito, naka­kuha na ang NFA ng 71 porsyento ng target, na katumbas ng 10.25 milyong bag ng palay mula Enero hanggang pangalawang linggo ng Nobyembre ng taong ito,” sabi ni Dar.

Sa pakikipagtulungan sa mga lokal na pamahalaan, 30 probinsya ang nakatuon sa pagkuha, proseso, at palay sa merkado, nang direkta mula sa mga magsasaka na nagdadala ng halagang P5 billion upang matulungan ang pagtaas sa presyo ng farmgate. Sinabi ni Dar na ang halagang “ay nasa itaas ng P3.5B credit line na binuksan ng mga lokal na pamahalaan ng Isabela, Nueva Ecija, at Camarines Sur upang magbigay ng pautang para sa mga magsasaka ng bigas sa kanilang mga lokalidad.” 

Naglaan din ang DA ng P375 milyon (M) upang matulungan ang mga hog raisers na ang mga bukid ay naapek­tuhan ng ASF. Ang halagang ito ay nasa itaas ng P100M na ginawa ng Pork Producers Federation of the Philippines, Samahang Industriya ng Agrikultura (SINAG), at National Federation of Hog Raisers Incorporated; at P1B mula sa contingency fund ni Pangulong Duterte. Huwag sana tayong maniwala at magpatangay sa paninira ng mga militanteng galamay ng mga komunismo.