Wa maka-build

Giawhag ni Senador Sonny Angara ang mga ahensiya sa gobyerno sa paggasto sa salapi niini alang sa Build, Build, Build Program aron maabot niini ang target sa pag-uswag sa nahabilin nga duha ka buwan ning tuig 2019.  

Sa pagkakaron nagpabilin pang ilusyon ang maong programa sa gobyerno ni Presidente Rodrigo Duterte tungod kay ang mga ahensiya nga iyang gitahasan sa pagpatuman sa nahisgotang programa wala pa gayod makasugod sa pagpatuman niini, matud pa ni kanhi Socioeconomic Planning Secretary Cielito Habito.

Tungod sa pagkalangay pag-aprobar sa 2019 nga budget sa gobyerno nga nakapugong sa pagsugod sa pagpatuman sa mga inprastraktrura ug social welfare nga mga programa, giawhag ni Angara ang tanang ahensiya sa gobyerno sa paggasto sa salapi nga gigahin alang niini aron molupad ang paglambo sa ekonomiya.

Nasayran sa senador kinsa mao ang chairman sa finance committee sa Senado nga 96 porsiyento na sa P3.67 trilyon nga budget ang napagawas na sa Department of Budget and Management sa panudlanan sa gobyerno niadtong katapusang bahin sa Septyembre ning tuiga.

Ang gobyerno ni Presidente Duterte nagtinguha sa pagtukod og 75 ka mga dagkong inprastraktora lukop nasud sama sa mga railways, dalan, taytayan ug tugpahanan sulod sa unom ka tuig niining termino.

Apan kining maong mga programa magpabilin lamang ilusyon tungod kay ang Department of Public Works and Highways ug ang Department of Transportation wala pa gayod makasugod sa pagpatuman kadaghanan sa mga programa nga nahisgotan, matud pa ni Habito.

Kining nahisgotan nga duha ka ahensiya nagpadayon sa kahinay niini sa pagpatuman sa Build, Build, Build Programa sa gobyerno nga basi sa taho sa Commission on Audit anaa pa ubos pa sa 30 porsiyento.

Mao ni ron ang suliran sa gobyerno ni Duterte, anaa na siyay salapi alang sa iyang Build, Build, Build Program apan wala pa gayud siya maka-build.