EDITORYAL - Naipit ang Pilipinas

Lisud kaayo ang posisyon sa Pilipinas sa international scene karon nga ang administrasyong Duterte gihasi niining mga pasangil nga human rights violations nga gitutokan sa United Nations Human Rights Council.

Ang Pilipinas usa sa mga signatories niini. Apan may talagsaong mga kaalyado ni Duterte sa UN. Ang mga bag-o niyang suod nga higala nga mao ang China ug ang Russia. Dili sila tradisyonal nga dumadapig sa Pilipinas kaniadto. Apan sa pagkakaron, murag sila ray masandigan ni Duterte. Ang China nga gisuod og maayo ni Duterte mahimo niyang kapangayoan og tabang pinaagi sa ilang impluwensya sa kalibotan.  Isip ikaduha sa tibuok kalibotan sa ekonomiya, bilyones dolyares na ang gipautang sa China sa nagkalain-laing mga nasud. Kun sila awhagon sa China paluyohan ang ilang gusto panahon sa botohay diha sa UN, dako ang purohang masunod ang gusto sa China.

Apan kun may suportang makuha si Duterte gikan sa China unsa sab kahay ilang pangayoong bayad?

Ang Pilipinas pagkakaron padayong nakigkombate sa katungod niini sa West Philippine Sea nga giangkon tanan sa China. Ang Arbitral Tribunal nipagawas og ruling pabor sa Pilipinas. Dili kaha mamintaha ang China karong nasayod man kini nga walay laing kasandigan si Duterte kondili sila lamang? Laing angay nga hinuktokan sa gobiyernong Duterte mao ang posibilidad nga kun magkinaunsa-kinaunsa bahin sa arbitral ruling kun pananglitan maabot kini sa UN, siguradong ang labanan sa kadaghanan sa mga nasud mao ang China. Kini tungod sa kadako sa mga utang aning mga nasura ug mahimo pang pasaligan nga pautangon pa gyud kun mopabor sila sa China.

Butang nga dili mahatag sa Pilipinas.

Sa pagkakaron, dili pa siguradong may mapaabot nga suporta ang Pilipinas gikan sa 18 ka mga nasud nga niuyon nga imbestigahon ang human rights violations dinhi, kay ang uban kanila tradisyonal pa niining kaalyado ug sila duna say impluwensya sa ubang mga nasud.

Mao nga dako kaayo kining hagit sa administrasyong Duterte, kinahanglang iyang timbang-timbangon ang posisyon sa Pilipinas sa international community ug iyang mga kaakohan sa katawhang Pilipino.