Magkakasunod na trahedya
AKO’Y nalungkot sa nabasa sa diyaryo at napanood sa TV na mga magkakasunod na trahedyang nangyari sa ating bansa. Naniningil na ang kalikasan dahil hindi natin ito napuprotektahan. Masyado tayong naging abusado.
Katatapos lamang ng lindol sa Batanes at hindi pa man sila nag-uumpisang bumangon, ayan na naman at meron na namang bagyong paparating. Kawawa ang mga kababayan nating Ibatan dahil ang tira-tirahan ng lindol na puwede nilang pagsilungan pagdating ng bagyo ay may mga bitak ang dingding o pader. Makikipagsapalaran sila kaysa naman manatili sa mga tent na isang bugso lang ng hangin ay giba na.
Araw pa lamang ang nakalilipas, trahedya na naman sa dagat ang nangyari. Tatlong magkakasunod na pampasaherong bangka ang lumubog biyaheng Iloilo-Guimaras. Hindi kaya kulang sa abiso kaya nangyari ang ganitong trahedya? May nauna nang lumubog na isa, dalawa, bakit napangatluhan pa? At ang rason kalma naman ang dagat nang sila’y maglayag dangan nga lamang at inabutan ng kamalasan pagdating sa gitna dahil lumakas ang ulan at sinalubong sila ng malalaking alon. Kaya wala ngayong mapagbuntunan ng sisi. Sa bawat pampasaherong barko o bangka man, ‘yan ay kumpleto ng kagamitan tulad ng life vest. Para abutan man ng ganitong aberya sa karagatan, maliligtas ang mga pasahero.
Ang patuloy na pananalasa ng dengue sa ating bansa ay nakakaalarma na. Hindi maawat ang mga pasyenteng nagpupunta sa mga ospital. Ang Dengvaxia na sana ay pipigil sa salot na dengue ay malabong kagatin ngayon ng ating mga kababayan dahil nga sa nangyaring kontrobersiya. Marami nang doctor ngayon ang nagrerekomenda dahil hindi nga masupil ang sakit na dengue.
Ang mahirap nito, we only take measures habang nandiyan ang problema. We should always take preventive measures after the disease is already upon us, by that time it’s too late.
- Latest