Endo, inaasahan ng mga Obrero
HUWAG naman sanang magwakas ang termino ni Presidente Duterte na hindi matupad ang kanyang campaign promise na wakasan ang kontraktwalisasyon o ENDO. Sapul nang magkaroon ng batas na tapusin ang kontrata ng mga manggagawa bago mag-anim na buwan sa serbisyo, nawalan na ng tsansa ang mga workers na maging regular sa trabaho. Kaya umaasa ang labor sector na sasambitin ito ng Pangulo sa kanyang State of the Nation Address (SONA) ngayon. Sana, sana nga.
Harinawang ang ipinakikitang political will ng Pangulo sa marami sa kanyang mga desisyon ay ipamalas niyang muli para sa kapakanan ng ating working class. Ang contractualizaton kasi ay nabuo noong araw upang masiyahan ang mga dayuhang investors at mahikayat silang mamuhunan sa Pilipinas. Ang problema naman, ang kinakawawa sa batas na ito sa kontraktuwalisasyon ay ang ating mga obrero na nawawala ang security of tenure. Obviously, nangingibabaw ang impluwensya ng mga mayayamang namumuhunan at ang nasasaktan ay ang mga dukhang manggagawa.
Ayon kay Sen. Joel Villanueva, mahalagang malagdaan sa susunod na linggo ang Security of Tenure Bill para sa kapakanan ng mga manggagawa kasama ang Service Charge bill. Kung magiging ganap na batas ang “End Endo” bill magkakaroon na ng seguridad sa trabaho ang libu-libong manggagawa na kailangan palaging mag renew ng kanilang kontrata. Naipadala na sa Malacañang noong isang buwan ang bill at posibleng kabilang sa mga babanggitin ng Pangulo sa SONA.
Kung tutuusin, hindi na dapat sambitin ng Pangulo ito dahil sa maraming pagkakataon ay nanawagan na siya sa ating mga mambabatas na pagtibayin na ang panukala.
Hindi ko maintindihan. Sinertipikahan nang “urgent” ng Pangulo ang nasabing Security of Tenure bill sa SONA noong nakaraang taon pero hindi pa rin ito ganap na batas. May mga nagla-lobby ba mula sa business sector laban sa pagsasabatas nito? Ayaw kong iisipin na nalalamnan ang lukbutan ng ating mga pinagpipitaganang mambabatas sa pagpigil nila na maging batas ang panukala.
Sana, mas bigyang timbang ng mga mambabatas ang kapakanan ng mga obrero kaysa kapakanan ng mga nagnenegosyo. Marami namang insentibong puwedeng ibigay sa mga investors pero huwag naman sana ang pambabarat sa suweldo ng mga manggagawa. Hirap na nga silang magtamo ng umento sa sahod, nawawala pa ang tsansa nilang maregular?
- Latest
