Arcilla out, Guardo in

Makalingkod ra gihapon si Konsehal Jerry Guardo isip konsehal sa dakbayan sa Sugbo bisan og napilde siya sa miaging eleksyon. Gihukman na sa tanang commissioner sa Comelec nga in-valido ang Certificate of Candidacy ni Konsehal Alvin Arcilla.

Tan-aw nako, ang nahitabo kang Arcilla, mahiagoman usab ni Konsehal Sisinio Andales nga iyang kaalyado sa Bando Osmeña Pundok Kauswagan (BOPK). Pareho sila nga nakahuman na og tulo ka termino pagka konsehal sa dakbayan.

Ang ilang argumento mao nga makadagan gihapon sila kay gisuspenso man sila sa hinapos nga bahin sa ikaduha nila nga termino nga mitapos kaniadtong 2016, tungod sa pagdawat og P20 mil nga cash assistance gikan sa siyudad bisan og wala sila mabiktima sa katalagman.

Giyam-iran ra sa Comelec ang ilang argumento kay kuno bisan og nasuspenso sila, nagpabilin man nga konsehal sila gihapon. Tan-aw nako nga ingon usab niini ang hukom sa Comelec sa kaso ni Andales, ug magpaabot na lang kita nga makalingkod usab pagbalik si Konsehal Joel Garganera nga maoy ipuli ni Andales.

Si Guardo maoy ika-siyam nga nakakuha og labing taas nga botos, samtang si Garganera ang ika-napulo.

* * *

Sa Mandaue City, nanumpa na sa iyang katungdanan kagahapon si Mayor-Elect Jonas Cortes dungan sa pagsaad nga iyang bugtian ang pagpili kaniya sa katawhan pinaagi sa paghatag og tinud-anay nga serbisyo.

Gitataw ni Cortes nga wala siya’y pagpinig sa paghatag og tabang, bisan kadtong mga tawo nga didto milaban sa iyang kaatbang sa politika sa miaging eleksyon, iyang serbisyohan.

Dihang bahina nga nakadayeg ko ni Cortes, kay dili siya sama sa ubang mga politiko nga maginukdanon ug modumot sa mga tawo nga wala modapig kanila sa eleksyon.

Tungod niining batasan ni Cortes, tan-aw nako nga lisud na siyang pildehon pa sa umaabot nga mga eleksyon. Tiaw mo nga bisan og dili pa siya mayor, apan gibisitahan dayon niya ang mga biktima sa sunog sa Barangay Tipolo.

Tan-awa karon, wala pa gani makalingkod si Cortes pagka mayor, daghan na nga mga balay-patigayon ang nanulod sa Mandaue, ug usa niini ang dakong tindahan sa mga litson ni boss Rico Dionson.

Ambot kun unsa kaha ang kalamboan niadtong dakong hotel gipasirad-an ni outgoing Mayor Luigi Quisumbing? Paminaw nako, mabuksan ra ni pagbalik, sama sa litsonan ni boss Rico dinhi sa siyudad nga gipasirad-an ni Mayor Tomas Osmeña.

Ang ako lang gyud nga awhag sa mga kawani sa City Assessor’s Office ug City Treasurer’s Office nga ayuhon ninyo pag-assess ang buhis ug kolektahon ninyo ang tukma nga kantidad nga para sa kagamhanan.