Pag-sure chief!

Gumikan sa pamahayag sa Presidente nga himoong 5 minutos na lang ang biyahe gikan sa Cubao ngadto sa Makati, midason ang hepe sa PNP-HPG, Brigadier Gen. Fajardo, nga posibleng makab-ot kini kon ipatuman ang mga lagda sa trapiko. Apan midason usab dayon siya nga ang pagpatuman  maoy dakong pangutana kon mahimo ba. Sa ato pa diay chief, ang 5 minutos gikan Cubao hangtud Makati, POSIBLE; ang pagpatuman sa lagda sa trapiko, IMPOSIBLE! Pag-sure chief uy!

Study now, water later!

Gitun-an sa kagamhanan ang posibilidad sa pagkontrolar sa serbisyo sa patubig sa Metro Manila, pamahayag pa sa tigpamaba nga si Atty. Salvador Panelo agi og tubag sa sugyot ni Bayan Muna Chairperson Neri Colmenares.  Samtang nagtuon pa ang kagamhanan, padayon pa usab ang pag-antos sa katawhan sa kanihit sa tubig. Mao ba kini ang giingon nga “Study Now, Water Later?”

Kontrobersyal nga pasaporte

Matud pa ni Foreign Affairs Secretary Teddy Locsin dili illegal ang pag-kanselar sa mga “diplomatic passports.” Hayan mabalik ra usab kini sa mga hingtungdan kon mahuman na pag-hukngay ang bag-ong lagda nga giumol alang sa pagpanghatag sa maong matang sa pasaporte. Ang maong lakang sa DFA kontrobersyal alang sa pipila lamang ka tawo, apan dili sa kinabag-an sa mga Filipino labi na sa mga OFW nga gitawag nato og mga ‘buhing bayani’. Kinsa man diay ang labaw’ng mahinungdanon?

Kaso ug pasaylo

Namahayag si PRO-7 Director Debold Sinas nga mapagamyan ang silot sa mga pulis nga misalmot sa KaPa kon sila mismo mangunay pagpasaka og sumbong batok sa maong korporasyon. Sama ra nga ningtuaw si Director Sinas ngadto sa mga pulis sa pag-ingon: “Kasohi sila kay pasayloon ko ikaw!”

Gikan sa tawo, pauli sa tawo

Napundok ang tanang matang sa basura ubos sa taytayan sa Mahiga Creek sa dihang mibundak ang makusog nga ulan niadtong Domingo sa hapon, Hunyo 23, 2019, hinungdan nga misuyla ang tubig sa maong sapa paingon sa kadalanan. Ang maong panghitabo usa ka tataw nga paghulagway sa panultihon: “BASURA, SA TAWO KA GIKAN, SA TAWO KA USAB PAULI!’