EDITORYAL - Lingion pa kaha mo?

Natapos na gyud ang piniliay kagahapon, ug samtang aduna nay mga pasiunang eskutenyo kun kinsay nakadaog sa local nga piniliay, paabuton pa ang opisyal nga resulta ug proklamasyon.

Samtang ang mga kandidato naghinamhinam pagpinaabot sa opisyal nga resulta kun nakadaog ba gyud sila, ang mga botante balik na sab sa normal nga kinabuhi. Balik sila sa pagkayano nga sakop sa katilingban.

Ang pangutana karon, kun kini bang mga botante natagbaw sa ilang gipangbotaran? Maayo tingaling mamalandong karon ang matag botante kun kinsa ilang gibotaran. Maayong ilang balikan og analisar ang matag kandidatong ilang gibotaran kun wala ba gyud sila masayop sa pagpili kanila nga sila makapalambo sa ilang lugar ug moserbisyo gyud sa katawhan.

Mao kini ang normal ug tarong nga botante. Maghunahuna daan una mobotar ug maghunahuna dalang paglaom nga nakatabang ang ilang boto sa kandidatong ilang gipili pinaagi sa konsensya ug kini moserbisyo og tarong. Apan namatikdan nga daghan sa mga nagbaligya og boto mga estambay ug kadtong mga bagis-bagis sa ilang lugar nga kusog mangaway sa silingan.

Ang kalainan nila sa tarong nga botante, sigurado gyud nga karong adlawa, nahurot na ang gibayad sa ilang boto. Balik na sab sila sa ilang naandan nga gawi matag adlaw. Subo kaayong pamalandungon nga daghan niining klaseha sa mga tawo ang makabotar gihapon nga unta wala man silay pagpakabana bisan gani sa ilang kaugalingon.

May dakong posibilidad pa gyud nga ang ilang boto makapadaog sab sa kandidato nga nakapalit sa ilang boto.

Unsa man intawoy kaugmaon sa lungsod kun ang nakadaog namalit og boto unya ang nakapadaog kanila mga way gamit sa katilingban?

Ang pangutana karon, kani bang mga botanteng nibaligya sa ilang boto lingion pa kaha og balik kandidatong nipalit kanila? Ang tubag dili. Kay kun gibuhat kini kaniadto sa mga kandidatong pirmeng modaog pinaagi sa pagpalit og boto, wala na untay botanteng mamaligya og botos karon.