EDITORYAL - Mikakak si Garma?

Dili gustong tubayan ni Cebu City Police Office director Police Colonel Royima Garma ang pag-atake kaniya ug sa iyang mga sakop ni  Cebu City Mayor Tomas Osmeña.

Ning uwahi, ang isyu bahin sa matud pa report sa Philippine Charity Sweepstakes Office ngadto sa National Police Commission, National Bureau of Investigation ug Department of Interior and Local Government bahin kang Garma.

Ang maong dokumento nga giwadwad ni Osmeña atubangan sa iyang mga supporters atol sa ilang miting de avance nag-ingon nga ang direktor sa kapolisan sa siyudad nagdawatan og tag P1 milyon nga payola gikan sa mga gambling lords sa Bohol.

Matud pa nahitabo kini sa dihang siya pay hepe sa Criminal Investigation and Detection Group-7 diin sakop sa iyang hurisdiksyon ang Bohol ug tibuok Central Visayas.

Si Garma wala mohimakak sa maong pasangil apan limitado lang iyang tubag sa pag-ingon nga na-cleared na siya sa maong isyu.

Wala hinuon siya mopakita og dokumento nga nagpamatuod nga cleared na siya sa maong kaso, apan siya nidugang nga na-promote pa man gani siya pagka-CCPO director. Laing bag-ong pasangil nganha sa kapolisan mao ang giingong pagsulod sa mga polis sa panimalay sa usa ka barangay official ug giwahing pa gyud ang CCTV cameras niini.

Si Garma miingon gikapoy na siya og sige og tubag sa media bahin sa mga akusasyon sa mayor ug gusto niyang adto nalang niya kining tanan tubagon sa korte.

Apan dili tingali ni makiangayon para sa mga Sugboanon nga nagpaabot  sa matag tubag sa mga pasangil batok sa opisyal sa ilang kapolisan.

Makaduda hinuon kini sa publiko kay daw mogawas man nga guilty ang tawong di motingog.

Mas labing maayong buhaton ni Garma mao ang pagtubag sa matag alegasyon kun dili tinuod ang mga pasangil batok kaniya tungod kay mao man kini naandan sa mga tawo sukad siya milingkod.