Hilom una, ayaw samoka

Dunay usa ka ginang nga daw naproblema pag-ayo sa iyang bana ingon man sa usa niya ka anak. Ang iyang bana, palahubog ug sugarol. Ang usa niya ka anak nakigtipon sa sama niya'g gender. Buot niyang sulbaron ang maong kahimtang kay dili siya makadawat unya sa posibleng negatibong mga komentaryo sa iyang pamilya ingon pud sa iyang mga silingan. Nagpakitambag siya kanako kun unsay angayan niyang buhaton. Ako siyang giingnan:

1. Ayaw una og hasonghasong karon kay tungod sa kapresko sa hitabo dili ka paminawon.

2. Anaa na sa hustong edad ang imong anak ug nakahimo na siya sa iyang desisyon. Kun nakahatag ka sa imong tambag, apan wala siya magpatalinghug nan, iya na kanang palas-onon.

3. Walay butang dilli mahimo sa pag-ampo, ato siyang iampo aron makamatngon ug malamdagan.

4. Atimana ang imong kaugalingon kay edaran ka na. Moabot ang panahon nga makaamgo siya sa imong bili.

5. Pamalandongi basin aduna pud kay sayop sa imong pagpadako kaniya.

6. Paghilom sanglit ang kahilom usa naman ka mensahe ug pagtulon-an.

7. Ayaw samoka ug dali dalia kini makahimo niyang masupilon ug sa binuhatan dili makamatngon.

Ang kaayohan dili dihadiha nato makab-ot. Usahay atong atimanon ang atong kaugalingon, ingon man higugmaon kay pinaagi lamang niini mas masabtan nato ang bili sa gitawag nilang self-care.