Ang kopras

Ning miaging mga adlaw gibaha ako og mga pangutana ngano kunong barato man ang kopras nga unta mahal man ang mantika.

Sa ilang mga pangutana nga migintang og adlaw ilang giingon nga tag kinse nalang ang kilo sa kopras unya pagkasunod adlaw tag trese na lang pagkasunod adlaw tag nueve na lang gyud ang kilo sa kopras.

Kasagaran sa mga nagpaabot sa ilang reklamo ug pangutana mga taga Bohol ug Leyte.

Wala ko masayod kinsa ug unsa ang ilang pagka tawo pero labing seguro mga maguuma og lubi ang mga nangutana nako.

Sulagma nga niadtong miaging semana mibisita sa Sugbo ang Gobernador sa Ilocos Norte nga si Imee Romualdez Marcos ug naimbitahan ko sa gipatawag niyang press conference.

Didto iyang nahisgotan ang kahimtang sa mga maguuma.

Dinhi akong nakonektar sa gihisgotan sa gobernadora sa kahimtang sa mga mag uuma og lubi sa pamasin nga iyang mapaabot ngadto sa mga tag-as nga opisyal sa gobiyerno ang reklamo ug akong masayran unsa pud ang iyang mahimo sa reklamo.

Ang tubag ni Marcos naghatag kanako og kasayoran nga dili lang diay ang mga taga Bohol ug Leyte ang apektado sa pagubos sa presyo sa kopras kun dili ang tibook nasud.

Ang sulbad sa suliran nga nahuna-hunaan sa gobernadora nga mao ang inter- cropping ug ang dili lang pagsalig sa kopras.

Gusto usab nga palamboon ni Marcos ang virgin oil production ug butong nga halinon kaayo sa gawas.

May punto si Marcos. Dugay nga kuwartahon ang kopras, kapoy ug hago pa unya paliton lang og barato. Maayo pa ang butong kay dili kaayo hago ug mahal kun paliton ilabi na gayud kun dili nimo i-agi sa mga middleman.

Tambag nako sa mga mag uuma og lubi biya-i ninyo ang kopras ug balhin kamo sa butong tan-awon nato dili ba mohilak ang mga negosyante og mantika.