Ilegal nga sugal gipasagdan ni Sinas

Ang akong higala nga broadkaster sa radyo ug telebisyon, mitug-an nga may mitug-an kaniya nga si Chief Superintendent Debold Sinas tangtangon gikan dinhi sa Central Visayas ug balhinon didto sa Camp Crame.

Para nako, dili ko mahinugon nga balhinon si Sinas gikan dinhi sa rehiyon kay dili siya perpekto sa iyang katungdanan. Nakaingon ko nga dili perpekto sa iyang katungdanan si Sinas kay wala gyud siya momando og hugtanay nga kampanya batok sa mga ilegal nga sugal.

Isip regional director sa kapolisan dinhi sa Central Visayas, makamando gyud si Sinas ngadto sa iyang mga city ug provincial directors aron nga hingusgan usab nila ang kampanya batok sa ilegal nga sugal, sama sa illegal swertres, video karera, moli-moli ug uban pa.

Kini si Sinas “opposite” kang kanhi PRO-7 Marcelo Garbo kaniadto nga ang gitutokan ra sab kay mao ang paggukod sa mga tigpasiugda sa mga ilegal nga sugal, apan gipasagdan ang problema sa shabu.

Matud sa mga opisyal sa kapolisan nga kasab-an sila ni Garbo kaniadto kon mohimo sila og kampanya batok sa mga tigpayuhot og shabu kay kuno dili kini ilang trabaho.

Wala magdugay, gidungog na nga si Garbo kakunsabo sa mga nagpayuhot og drugas ug gani wala na mahibaw-i kon hain na karon. Wala gyuy rason si Sinas kon nganong wala siya mohimo’g kampanya batok sa ilegal nga sugal.

Wala malilong kanato nga mikatap na pag-ayo ang mga ilegal nga sugal, ug daghan ang mga opisyal sa barangay nga maoy nag-finance sa illegal swertres, bisan dinhi sa siyudad sa Sugbo.

Diha lang sa Barangay Suba, Dakbayan sa Sugbo, tunog kaayo nga adunay mga opisyal sa barangay nga maoy nag-operate og video karera ug moli-moli. Bi, nganong wala man kini himoi ni Sinas og kampanya?

Susama nga pangutana ang akong ipangutana kang Senior Superintendent Royina Garma, kay siya man maoy director sa kapolisan dinhi sa siyudad.

Dili na lang kita maglaom nga si Mayor Tomas Osmeña momando og kampanya batok sa ilegal nga drugas kay nagkaduol na ang eleksiyon. Ang mayor giisip nga Napolcom deputy ug makamando sa mga polis, apan sagad sa mga politiko, mahadlok nga mohimo’g mga estrikto nga lakang nga makapaapike sa ubang botante. Dili ba tinuod?

* * *

Usa nako ka higala nga nagpapili og elective position dinhi sa dakbayan sa Sugbo, mitug-an nga gikapoy na kaayo siya sa pagsuroy sa lainlaing barangay kada adlaw.

Nasayran nako nga walay pahuway, bisan og Domingo, suroy gihapon sa kabarangayan aron sila makahimo og pangampanya. Aw, ngano bitaw’ng mi-enter?