LTO dili patas

Dugay nang nakabayad ang mga tag-iya sa rehistro sa ilang mga sakyanan ngadto sa Land Transportation Office (LTO).

Lakip na kadtong mga daang behikulo nga gimandoan sa maong ahensiya nga ilisan na’g bag-ong plaka, gilokatan sab sa mga owners niadto gyung panahon nga gianunsiyo kini.

Apan nag-abot na lang ang daan ug bag-ong nabayrang mga plaka, katuigan nanglabay sa paghinulat hangtod gipul-an na lang mga tag-iya pagsige’g paningil sa LTO, wala gyuy plakang miabot.

Daghang gisakitan. Kay nahibalo sila nga istrikto ang LTO. Usab, nakapanghupaw maalamong negosyante, kinsa anaay ubay-ubayng sakyanan nga nagdagan, diin dakodako gyud ang kantidad nga nabayran, pero walay plaka nga nadawat gikan sa LTO.  Gani, sila magpautang man sa ilang  kustomer.  Ang produkto ila nang gihatag daan sa nangutang. Pero ang bayad, wala pa nila madawat.

Ang LTO bali. Gipangayo daan ang bayad sa gibaligyang produkto, pero ang produktong plaka, wala gihatag on time. Giunya-unya,  hangtod nanglabay na lang ang daghang bulan ug nahimong katuigan, mga plaka wala gihapon.  Lingolingo ang mga Intsek, uy!

Nakuwenta man gud nila, nga kon kadtong kantidad nga ilang nabayad sa LTO, ila pang gisulod sa banko o giapil pag-roll sa ilang negosyo, motubo gyud kini ug modaghan.

Unta, wala man diay plaka nga ikahatag ang LTO, wala na lang usab unta kini nila iapil sa kuwentada sa pagrehistro sa sakyanan.

Hinuon, in fairness, ning tuig 2018, gi-release na ang mga bag-ong plaka para niadtong narehistro gikan sa Hulyo 2016 hangtod October 2017.

Apan dili pa tanan. Ang nakaporke kay nahilo na ang mga car owners ug dealers sa pagpinaabot ini. Hinungdan, nga diyotay ray nanguha.

Gumikan niini, mi-set og deadline  for release ang LTO, diin kutob sa kadtong dili makakuha, makabayad og dakong multa kon masakpan nga temporary plate number gihapoy gi-usar. Ang pangutana, fair ba?

LTO, sa sayop nga inyong nahimo, diin napurhisyo ang mga hingtungdan sa pagpinaabot sulod sa mga katuigan nga nanglabay, mga number of months ray inyong ilugway?

Unya, multahan pa gyud kon molapas? Sirs, dili mo maluoy nila? Sila baya ang nagsuweldo ninyo, do!  Please, think kon patas ba kining inyong gibuhat?