Garma nagpailad

Ang nindot nga himoon sa Cebu City Mining and Regulatory Board nga susihon nila ang kabukiran nato dinhi sa siyudad ug pahunongon gyud ang mga walay permit sa pagpahigayon og quarry operations.

Nahibaw-an na man diay nga usa ra ang gihatagan og quarry permit dinhi sa tibuok siyudad, unya nganong wala man lagi lihoka sa Mining and Regulatory Board ang pagpahunong sa mga ilegal?

Kini maoy angay’ng ipasabot sa Board nga gipangulohan ni Konsehal Alvin Arcilla kay siya man ang gitugyanan ni Mayor Tomas Osmeña kabahin niining maong isyu.

Sa ako na nga giingon, ang wala niya pagtagad sa mga ilegal nga quarry operations, magtuo gyud ang mga tawo nga nakabahin siya sa kita niini.

Busa, mentras tanto nga may higayon pa konsehal, lihoka na.

Gusto ka ra ba kuno nga magpapili pag-usab pagka-konsehal ubos sa baruganan nga may katungod ka pa human masuspenso tungod sa pagdawat og P20 mil nga calamity assistance.

Sa Barangay Budlaan ning Dakbayan sa Sugbo, may quarry operations kuno nga gidumala sa usa ka Fredo, ug panahon ra sa gabii kini mag-operate.

Utro pa kining kadagkoan sa DENR nga wala magtagad.

Inyo unta nga gipadad-an og suwat ang kagamhanan sa dakbayan, ug sa probinsiya, kon ang dapit tua mahimutang sa lalawigan.

Susiha ninyo o, sa Barangay Cabungahan, Danao City kay nakadawat ko og report kabahin sa giingon nga illegal quarry sa maong dapit.

* * *

Pastilan, may mi-report kanako nga sa Sitio Ponce sa Barangay Caretta, dunay mga polis sa Waterfront Police Station nga nang-raid ug gidala ang iladong drug pusher, apan ang akong informer nahibong kay may nakuha man unta nga shabu gikan sa dinakpan, apan gibuhian ra man pagka ugma. Duna ko’y ngalan sa polis nga gihatag sa informer nako, ug kining maong ngalan, kanunay gyud nako nga mabasahan sa mga report nga gikan sa akong mga tigpaniid.

Pagbantay diha sir. May polis ba usab diha sa Station 3 nga giingong maoy protektor sa mga pusher sa Tejero.

Grabeha ninyo no? Wala pa ninyo aksiyoni ang mga ilegal nga sugal sama sa illegal swertres, video karera ug moli-moli, unya manakop mo og pusher, buhian ra sab? Mahibaw-an gani mo ni Digong, aw, matodas gyud mo sa ilang hunters team. May higayon pa sa pag-usab sir.

Diha sab sa Station 6, utro pa ni nga wala magpakabana sa mikatap nga illegal gambling sa ilang area.

Kon mo-report ngadto kang Colonel Royina Garma, mangangkon nga wala na kuno’y mga illegal gambling, apan sulti ra diay to.

Si Garma nagpailad sab.