EDITORYAL - Unahon pagtabang

Ang katalagman usahay matag-an apan kasagaran dili gyud mananghid hinungdan nga dunay daghang makalas ug grabeng kadaot nga biyaan sa maagian niini. Ang Pilipinas adunay di momenus 20 ka mga bagyo nga mosulod matag tuig. Samtang tuod ang uban dili kaparehas og gikusgon ug kadaot nga gibilin. Busa dako og papel ang gobiyerno ilabi na ang mga lokal nga kagamhanan aron sa pagtabang kanila isip representante sa gobiyerno.

Aron pagsiguro nga gamiton ang kwarta sa gobiyerno sa hustong paggasto, naa gyud hustong kwentada ug resibo. Ug aron di magpaturagas adunay ahensya sa gobiyerno nga gitahasan para motutok sa gipadulngan sa kwarta. Mao kini ang papel sa Commission on Audit nga adunay giandam nga mga circulars, audit rules ug uban pa aron di mausik ang salapi sa katawhan. Sila maoy tiggukod sa mga opisyales sa gobiyerno nga nangurakot sa pundo.

Apan gumikan sab sa maong mga patakaran, nagapos ang mga kamot sa mga opisyales sa gobiyerno sa daghang serbisyo alang sa katawhan ang wa mahatag. Mao sab kini rason kon nganong adunay mga opisyales ang nangapriso tungod sa dili maesplikar nga pagastos sa kwarta sa publiko. Maayo gyud nga adunay ahensyang sama niini kay kon wala pa hagbay rang nagpakadato kaning ubang opisyales ug ang gobiyerno maoy mapurdoy.  Apan unsaon man kon ang kwarta gikinahanglan dayong gamiton apan makalapas sa mga circular? Anhang dapita magkasungiay ang opisyales nga nagkinahanglan ug ang COA. Si Pres. Duterte midepensa sa mga LGUs nga nakasinati niini nga kalisod sa mga kamot sa COA kay sa iyang patakaran angay nga unahon gyud ang kaayohan sa katawhan nga nanginahanglan dihadiha og panabang.

Adunay mga patakaran ang COA nga nagtugot niining gitawag og emergency purchases o kanang dinalinang pagpamalit sa mga gikinahanglan kon may kalamidad. Ang pangutana, kinahanglan pa ba diay kutikutihon kon gikinahanglan na gyud ang hinabang? Ang labing maayo tabang una ayha kutikuti.