Unconditional love

Suwerte ang babaye kon ang naparis niyang lalaki sa kinabuhi, siya ra ang gihigugma ug wala na’y lain gawas sa Ginoo. Sama niadtong nahitabo sa usa ka bana, kinsa tapus buwagi sa iyang asawa, naguol ug na-disturbed pag-ayo kay dili makadawat. Hinungdan, nga moadto unta siya ni Archbishop Jose Palma aron mangayo’g spiritual counseling. Apan subo lang palandungon, nga imbes mahapsay ang nagubot niyang alimpatakan, ang hinanaling kamatayon maoy iyang nasugatan.

Dili mabasol ang kapolisan, kinsa dali nga miresponde sa delikadong alarma bahin sa usa ka armadong tawo nga misulod sa Archbishop Palace ug nangita sa kinatas-ang lider sa simbahang Katoliko. Igo lang gipanalipdan ang ilang kaugalingon kay matud pa sa report nga giunhan sila og pusil sa naasoy’ng tawo. Busa, napugos sila pagbawos.

Kon wala lang magdala’g armas ang maong tawo, tingali mahatagan unta siya og spiritual enlightenment sa ubang kaparian in the absence of Archbishop Palma ug magpabilin siyang buhi nga mahayagan ang kadulom sa dalan nga iyang giatubang.

Unsa kaha ang gibati sa iyang misis, no? Nalipay kaha siya ning gidangatan sa bana tungod sa iyang hukom nga pakigbulag? Dili ba miingon man ang Balaang Kasulatan nga walay si bisan kinsa nga makabulag sa duha ka nagkahinigugmaay’ng binuhat nga gihiusa atubangan sa Diyos?

Akong amigo nakasala sa iyang asawa. Bisa’g giunsa niya’g pangayo’g pasaylo, wala gyud siya pasayloa. Busa, gibiyaan gyud siya. Kini nagpasabot lang nga ang  gugma sa iyang misis may limit ug dunay kondisyon. Buhat nga nagbatok sa sugo sa Ginoo sanglit ang gugma nga maoy gusto Niyang ipasunod, mao man ang gugma nga unlimited ug unconditional.

Sa lugar sa bana, gibiyaan siya sa asawa kay nangita’g lain luyo sa iyang pagbinuotan, sanglit kulang ang kalipay nga iyang ikaintrigo kada dulog nila.

Ug sa tinuoray lang, dili na gyud siya makahatag sa katagbawang gipangita sa batan-ong kapikas. Naningkamot siya’g maayo nga mahustoan ang iyang pinanggang misis.

Pero gibiyaan gihapon siya, uy!  Apan inay maguol, nalipay hinuon siya. Ngano? Kay bisa’g nagluib na ang asawa, wa gyud niya mansahi og sala ang iyang pagkabana. Hinunoa, maoy iyang gipakita ang gugma nga Iyaha sa Ginoo – ang love without limit and without condition.  Buhat nga makapa-Langit!