Sa proyektong bitin sino ang pananagutin?
INIHAYAG kamakailan ni Presidente Duterte na direktang mananagot ang mga namumuno sa iba’t ibang departamento ng pamahalaan sa mga palpak na implementasyon ng mga proyekto.
Matagal nang problema iyan kahit sa mga nakalipas na administrasyon. Minsan, may pasisinayaan (kuno) na tulay, yun pala ay luma na ito ang pinintahan lang, tapos kukunan ng larawan para maipakita sa taumbayan na may nagawa ang pamahalaan.
Sana ay totohanin ng Pangulo ang kanyang babala sa mga cabinet secretaries. At sana ay patawan ng pinakamabigat na parusang puwedeng ipataw ang sino mang nagsasamantalang miyembro ng gabinete.
At ang nakagugulat ay ang walang puknat na pagwasak sa mga sementadong lansangan na hindi naman sira para maipakitang nagtatrabaho ang pamahalaan. Eh bakit hindi ituon ang mga gawain sa napakaraming wasak-wasak na kalsada na maliwanag na hindi nabibigyan ng pansin. Nagtataka talaga ako dahil wala pang dalawang taon, ang kalsadang kagagawa ay winawasak na naman para gawin.
Sabi ng Pangulo Pangulo sa kanyang talumpati sa National Science and Technology Week, wala pa raw siyang nakitang lansangan sa Pilipinas na natapos sa tamang oras na hindi kinapapalooban ng anomalya. Malinaw na banat ito sa Department of Public Works ang Highways (DPWH).
Madalas, ang mga big-time road projects ay itinatayo para paboran ang ilang land developers para tumaas ang presyo ng mga lupaing ibinebenta nila. Kay sagwang sistema! Dapat lalong patunayan ni Duterte ang sinseridad niyang sugpuin ang matinding graft and corruption sa bansa.
- Latest