Lahutay sa Kapamilya Run
Dihay mga higayon nga gibug-atan na mi sa daghang kakulian pagpasiugda og tinuig nga lumba sa dagan, mao nga nakahunahuna mi nga makiglambigit na lang sa mga may mas lapad og kasinatian sa hapit matag semanang kalihokan.
Apan sa matag higayon, may mohunghong namo nga lahi ang Kapamilya Run, usa sa kasaulogan sa anibersaryo sa DYAB Abante Pa, Bisaya! matag Hunyo.
Mao ra ni lumba nga nagdasig sa tibuok pamilya sa paghiusa sa pagdagan, sa way pagpalabi sa ganansiya ug sa paghalad sa kita ngadto sa labing nagkinahanglan nga mga masakiton.
* * *
Mao nga sa makausa pa, ania, nagtuga-tuga na sab mi og pahigayon sa DYAB Island Premium Paints Kapamilya Color Run karong sayo sa buntag sa Ayala Terraces sa Cebu Business Park ug sa labing dagkong kadalanan sa Dakbayan sa Sugbo.
Nahuman na tingali ang lumba sa higayon nga nakabasa ka niini. Nanghinaot mi nga nilampos ang mga paningkamot paghimo sa lumba nga mas hapsay, mabulukon ug makahuloganon alang sa tanang nanagan ug nanan-aw, ug makatigom unta og mas dakong pundo alang sa mga pasyente sa Tabang Patrol sa DYAB ug TV Patrol Central Visayas.
* * *
Dakong hagit ang pagkumbinser sa mga mangapil sa pagpalista og sayo. Kasagaran nila, tungod tingali sa kadaghan sa mga lumba nga ilang kapilian, magpa-rehistro sa kataposan na nga mga adlaw. Mao nga magpunsisok ang registration centers sa bisperas ug sa kadlawon sa lumba.
Lisud sab ang pagbanabana sa gidaghanon ug gidak-on sa running shirts ug kategoriya sa race bibs aron dili magkuwang, o kaha magsubra. Ang mga mauwahi, mapugos pagsul-ob og mas luag, o mas hugot ug bibs nga gisapawan og pentel pen ang mga kategoriya.
* * *
Salamat sa among mga kaabag, Sports and Fitness Enthusiasts (SAFE) ni Joel Baring nga maoy race director, Megawear ni Excel Canque, ang naghimo sa shirts ug race bibs, ug MetaJe Engravers, ang nag-umol sa mga medalya, kay nakahilwas mi sa kaliboan ug usa ka gimbuhaton.
Salamat sab sa mga manggihatagon nga nitunol og kuwarta aron libre ang pagdagan sa kabus nga kabataan sa kabaranggayan ug nihalad og dugang pagkaon alang sa mga nangapil.
Ug sa mga nanagan, nga kasagaran mga sakop sa pamilya, kompaniya ug kahugpongan, daghang salamat sa inyong pagsalig.
* * *
- Latest
