Naburyong sa aso sa politika

Daghan ang nakamatikod nga mora og mitibugsok na ang kalidad sa dagan sa politika sa dakbayan sa Sugbo.

Mora og nawala na ang disente nga pagbinayloay og opinyon, basta motumaw na gani ang politikanhon nga engkwentro.

Sa niagi nga semana, miakusar si kanhi mayor Michael Rama nga usa kuno ka drug addict si Konsehal Margot Osmeña.

Hagbay ra kuno si Rama nakadungog niini ug matud niya nga iya kini nga giisa nga isyu tungod sa paghingalan usab ni Mayor Tomas Osmeña sa ila nga grupo nga “Team Suyop.”

Sa akusasyon ni Rama, adunay posibilidad nga mopasaka kuno og kaso si Margot batok sa kanhi mayor.

Hinuon, dali usab nga nakadepensa si Mayor Osmeña sa iya nga asawa ug nga dili na kuno siya moesplikar kabahin sa alegasyon.

Hagbay ra usab nga gipasanginlan ni Mayor Osmeña si Rama nga nalambigit kuno sa ilegal nga druga. Gani, halos matag adlaw niya nga ibalik ang mao nga alegasyon.

Ato nga mahinumdoman nga usa si Rama sa mga lokal nga opisyal nga gipasanginlan ni Presidente Rodrigo Duterte nga nalambigit kuno sa druga.

Apan niini nga paghinapakay nila og alegasyon, mora na man og nitibugsok ang maayo nga pangisip sa ato nga mga politiko dinhi sa dakbayan.

Klaro nga mora og binata kining ila nga mga paglinabayay og alegasyon kon si kinsa ang naadik sa druga.

Nagpasabot ba kini nga nadala na sila sa sistema sa hinanggaw nga paagi sa pag-ataki sa kontra sa politika?

Makauulaw kini alang sa siyudad tungod kay sa tanan nga local government unit, and siyudad sa Sugbo lang ang dunay mga opisyal nga mas labaw pa sa mga bata ang sinungogay.

Dili bugo ang mga Sugboanon nga mahimuot sa ila nga banghagay sa druga. Gani daghan kanila ang wala gayud mahimuot niini gumikan kay mora na hinuon og dili mga halangdon kini’ng ato nga mga politiko.

Pagkaalaot ba sa siyudad sa Sugbo tungod kay nagsugod na man hinuon og likoy kining ato nga mga politiko. Mora na man hinuon og naburyong na sila sa aso sa politika.