Mosulbong ug motibugsok
Bisan sa gikabalak-an nga laing dako nga umento sa presyo sa mga produkto sa lana karong semanaha, nga modason sa makalilisang nga umento niadtong Martes, niay balita nga mahimong pasikaran sa mga pangagpas nga dili magpatuyang ang paglayat sa presyo sa kalibutanong merkado:
Gipahibawo sa Saudi Arabia, pangulo sa Organization of Petroleum Exporting Countries (OPEC), ug Russia, pangulo sa non-OPEC countries, nga dugangan ang ilang produksiyon sa lana og hangtud sa usa ka milyon ka baril sa lana matag adlaw. Nitidlum dayon og 3% ang presyo sa lana human sa pahibawo.
* * *
Gipasabot hinuon sa OPEC nga ang pagdugang sa ilang produksiyon atol sa ilang tigum sa Vienna sa sunod buwan, dili mosangpot sa pagbaha sa kalibutanong suplay, nga maoy nakapatibugsok sa presyo sa niaging duha ug tunga ka tuig. Igo lang nilang tapakan ang dakong pagtidlum sa produksiyon sa lana sa Venezuela nga naputos karon sa grabeng politikanhong krisis.
Mao nga may sukaranan gihapon ang kahadlok nga mosulbong ang presyo sa lana hangtud sa $100 matag baril, gamay na lang og kuwang sa kinatas-an nga ang-ang nga naabot niadtong Hunyo 2014.
* * *
Gikabalak-an nga ang pagsige og saka sa presyo sa lana makapahagsa sa kalibutanong ekonomiya nga makapatidlum na sab sa demanda ug busa mopatibugsok na sab pagbalik sa presyo.
Inay mopalabi sa ilang kahakog sa pagpaburot sa ilang ganansiya pinaagi sa artipisyal nga pagpaubos sa suplay, giawhag ang OPEC ug non-OPEC countries sa pagpabilin na lang sa presyo gikan sa $70 ngadto sa $80 matag baril nga maoy motino sa kinadak-an nilang kita.
* * *
May mas mahinungdanong pasidaan ang mga eksperto: Inihap na lang ang malipayong mga adlaw sa OPEC ug non-OPEC countries, kay ang gitakdang pagpadagan sa 240 milyones ka sakyanan nga de kuryente unya sa 2040 mopapas sa $19 trilyones nga kita sa lana.
Samang mga eksperto nangagpas nga magsugod og tibugsok ang kalibutanong demanda sa lana sa tungatunga sa 2020. Mahimo gani nga moabot og 8 milyones ka baril matag adlaw ang maiban sa panginahanglan sa kanasuran.
Mao nga gipaabot nga molugapak ang presyo sa lana ngadto sa $32 matag baril, nga maoy kinaubsan nga ang-ang nga naabtan sa tungatunga sa niaging tuig.
* * *
- Latest
