Tinun-an ni Rizal sa Malaysia
Tinuod ba nga tinun-an ni Dr. Jose Rizal ang sunod nga primero ministro sa atong silingang nasud sa Malaysia? Husto ug sayop:
Sayop kay wa magkita sila si Rizal ug Anwar Ibrahim ug naa pa siya sulod sa prisohan ug dili pa makalingkod dayon isip bag-ong pangulo sa 32 milyones ka Malaysians; apan
Husto kay mga pagtulon-an ni Rizal ang nakadasig sa pamolitika ni Anwar ug nakadaog sa piniliay sa Malaysia niadtong Miyerkules ang alyansa nilang Anwar ug kanhi Primero Ministro Mahathir Mohamad batok sa incumbent nga si Primero Ministro Najib Razak.
* * *
Si Anwar ang labing masilakon nga bituon sa politika sa Malaysia hangtud nga napriso tungod sa kasong sodomy niadtong 1999.
Naabsuwelto siya niadtong 2004, apan gibalik siya sa prisohan human gipatigbabaw ang iyang pagkakonbikto sa ikaduhang kasong sodomy niadtong 2015.
Sa prisohan nabasa ni Anwar ang Noli Me Tangere ug El Filibusterismo ni Rizal nga nitunglo sa pagpanaugdaog sa mga Katsila ug nahimong pabilo sa rebolusyon sa katawhang Pilipinhon.
Nadasig sab siya sa Mi Ultimo Adios. Gihulagway niya si Rizal nga higanteng bantayog nga nakapukaw sa Asya duha ka siglo na ang nilabay.
* * *
Si Najib tinun-an ni Mahathir. Siya ang nakasunod sa gamhanang partido ni Mahathir, ang United Malays National Organization (UMNO).
Apan tungod sa pagkalambigit ni Najib sa binilyon ka dolyar nga pangurakot, nibiya si Mahathir sa UMNO ug nitapon sa oposisyon nga gipangulohan ni Anwar.
Nisuway unta pagtambag si Mahathir sa iyang tinudloan nga si Najib sa pag-angkon og responsibilidad.
Apan niinsistir si Najib nga wa siya mangurakot ug nigamit sa tanang kahimanan sa gobiyerno pagtabon sa eskandalo.
* * *
Si Mahathir, 92, mahimong labing hamtong nga pangulo sa nasud sa pagbalik sa katungdanan nga iyang gihuptan sulod sa 22 ka tuig.
Nipasalig siya nga limpiyohan ang hugaw ni Najib apan dili magdugay sa katungdanan.
Mangayo siya og royal pardon alang ni Anwar. Kon gawasnon na si Anwar, mopadaplin si Mahathir aron nga si Anwar na ang primero ministro. Matud niya ang pagligid sa daghang katuigan maoy nakapapas sa ilang panagsungi ni Anwar, nga sa kataposan makapatuman na sa iyang damgo nga ang mga pagtulon-an ni Rizal sa kagawasan ug demokrasya mapakatap sa tibuok Asya.
* * *
- Latest
