Ganyan kalakas ang Presidente
MAKAPANGYARIHAN ang Presidente kaysa Ombudsman, Korte Suprema, at Kongreso. Napatunayan na naman ‘yan sa pagsuspinde ni Rodrigo Duterte kay Overall Deputy Ombudsman Melchor Carandang. Nag-”leak” umano ang huli ng sikreto at palsong papeles ng umano’y daan-milyon-pisong tagong yaman ni Duterte sa banko. Katulad ito ng mga dokumentong batayan ni kaaway na Sen. Antonio Trillanes sa paghabla kay Duterte ng plunder sa Ombudsman nu’ng Mayo 2016.
Kinontra ni Ombudsman Conchita Carpio Morales ang suspensiyon. Nagpasya kasi ang Korte Suprema nu’ng 2014 na hindi maari disiplinahin ng Presidente ang mga Ombudsman deputies, dahil labag sa Konstitusyon at pagiging independent ng opisina. Pasya ito sa pagsuspinde ni President Noynoy Aquino nu’ng 2011 kay Deputy Ombudsman Emilio Gonzales.
Pinagkaisahan si Morales ng Executive Secretary, Presidential Chief Legal Counsel, Presidential Spokesman, Solicitor General, at Labor usec. Kesyo maghabol daw siya sa Korte (kung saan napalitan na ni Duterte ang apat na mahistrado). Kesyo maari daw siya kasuhang kriminal at i-impeach ng Kongreso (hawak nila ang super-majority.)
Bago si Duterte, pinalayas ni President Noynoy Aquino si Ombudsman Merceditas Gutierrez, at iniluklok si Morales. Tinugis ng huli ang mga oposisyong mambabatas lang dahil sa pork barrel. Pina-impeach din ni Aquino si CJ Renato Corona sa tutang Kongreso.
Bago si Aquino, iniluklok ni President Gloria Arroyo si Gutierrez, na subok nang loyalistang justice secretary. Kaklase ito sa law school ni First Gentleman Mike Arroyo. Pina-dismiss niya sa Kongreso lahat nang impeachment. At isiningit si Corona bilang CJ nu’ng 2010 maski bawal siya sa Konstitusyon mag-appoint dahil pababa na sa puwesto.
Napapaluhod ng Presidente ang Ombudsman, Korte, at Kongreso. Hindi ito matatanggal o kulong sa katiwalian, abuso o katraydoran.
- Latest