Ang sugar free nga diyeta (2)

Grabe na kadaghan kining 338 kaloriya, o 94 gramos nga pagkonsumo sa asukar kada adlaw, sigun pa sa gihimong pagbanabana didto  sa Amerika. Gikinahanglan nga mapangitaan og paagi nga makat-on kita nga kamenosan ang pagkaon og tam-is kay ingon sab niini ang problema dinhi sa ato.

Usa sa rekomendasyon nga gipaambit kanato sa mga eksperto, mao nga angay natong sagupon nga estilo sa pagkaon ang ‘sugarfree diet’. Kon kini seryuso nga masunod, dako ang matabang nga kamenosan ang risgo nga maantimano kita sa daghang komplikasyon sa isyu sa panglawas. Sama sa ‘obesity’, ‘auto-immune’, diabetes-2, problema sa paghilis sa kinaon ug uban pa nga mga komplikasyon niini.

Unsa’y mga pagkaon nga menos o walay asukar (carbohydrates) apan mabusog o makapatagbaw gihapon.?

* Mga protina – Naa kini sa karne gikan sa mananap nga linawgan og buhing sagbot, mga itlog, isda, mga utanon nga himsog sa tambok (healthy fats), ug uban pa. Niini, matingob nga kamenosan ang kaloriya ug asukar, nga atong makonsumo sa kada adlaw.

Samtang gianam nato ang pagpugong sa pagkahinam-is, mahimong sa sinugdanan malisud kini nga buhaton, apan sa kadugayan mabatyagan mo ang himsog nga resulta sa lawas. Ingon sa wa ta’y masinati nga kahasol nga gilukob sa kabaskog. Nawala na ang pagkagumon sa asukar nga maoy kapritso sa kaluyahon sa lawas.

Kon dili kapugngan ang pagkonsumo og subra sa asukar, tandugonon kita sa implamasyon, magkamenos ang prodaksyon sa hormones. Kuhaan ta sa kusog o enerhiya mao nga maluyahon kanunay ang lawas. Dili tanang asukar mga tam-is, duna sa’y tab-ang nga pagkaon nga inigsud sa ginhawaan mahimong asukar, sama sa bugas-humay ug ubang harinahon (starchy foods), angay usab kini nga limitahan.