Pakusog sa siguridad

Sama sa nangaging selebrasyon sa Fiesta Señor, maayong pagkahan-ay sa otoridad sa siguridad sa maong kalihokan. Kudos ngadto sa kapolisan, kasundalohan, barangay tanod ug uban pa nga miabag aron hapsay ang dagan sa maong kasaulogan.

Epektibo gayud ang pagpatuman sa lokal nga kagamhanan  sa dakbayan sa Sugbo sa liquor ban sulod sa 300 metros gikan sa rota sa grand parade sa Sinulog. Wala gyuy mga hubog nga nagsumparay sa mao nga rota, dili sama sa nangaging mga selebrasyon.

Pasalamat kita tungod kay mikooperar usab ang katawhan. Hapsay tuod ang dagan sa kasaulogan sa fiesta gumikan usab sa pagbaton og disiplina sa kinabag-an.

Maayo gayud nga aware usab sila sa ilang siguridad hinungdan nga wala’y dautang panghitabo nga mitumaw kaniadtong Domingo.

Alang usab sa kapolisan, dako kuno ang gikatabang sa pagputol sa mga signal sa cellular phone niadtong Sabado ug sa mismong sa adlaw sa Fiesta Señor. Gitumong kadto sa otoridad aron lagi paglikay sa unsa man nga plano sa pagpangataki sa mga terorista.

Apan sama sa akong unang baruganan, subra ra ang pagputol sa maong signal sa cellphone. Dili usab tiaw ang kahasol nga dala niini ngadto sa kinabag-an, ilabi na panahon sa emerhensiya. Sama niadtong usa ka deboto nga human nahulog ang iyang kwarta, maglisod na siya’g kontak sa iyang mga kauban kay wala lagi signal.

Hangtud karon, wala gihapon ko makakuha sa logic ngano nga kinahanglan pa nga putlon pa sa otoridad ang signal sa cellphone atol sa selebrasyon sa Fiesta Señor. Kon gusto gayud sa mga terorista nga moataki, mangita gayud sila og paagi bisan kon putlon pa ang tanang signal sa cellphone.

Hinuon, wala gyuy mahimo ang katawhan basta ang otoridad na ang momando. Kon ila nga padayonon ang pagputol sa signal sa sunod selebrasyon sa Fiesta Señor, ila kana nga desisyon. Apan hinaot nga ila usab nga hunahunaon ang pagka-kinahanglanon sa komunikasyon atol sa maong selebrasyon.

Sa laing bahin, maayo kining saad sa otoridad nga ila pa nga pahugtan ang siguridad sa selebrasyon sa Fiesta Señor karong sunod tuig.

Sa gatusan ka libo nga modagsa sa kadalanan, angay lang nga pakusgan pa nila ang implementasyon niini matag tuig.