EDITORYAL - United Nations

Mismo na ang United Nations (UN) Secretary-General Ban Ki-Moon mipadayag sa iyang dakong kabalaka sa mga pamahayag ni President-elect Rodrigo Duterte nga matud pa susama og nag-endorsar sa ’extrajudicial killings’ apil na kadtong pagpatay sa mga kurakot nga sakop sa media.

Si Ban nikondenar sa pamahayag ni Duterte dihang gipangayoan siya og panahom sa mga sakop sa UN Correspondents Association. Matud ni Ban nga ilegal ang pagpatay ug tataw kaayong walay pagrespetar sa batakang katungod ug kagawasan sa usa ka tawo.

Nabalaka si Ban kay ang Pilipinas kaniadto usa sa gikonsiderar nga “Most Dangerous Work Place for Journalist” tungod sa mga kaso sa pagpatay sa mga tigbalita.

Giluwatan ni Duterte ang pamahayag atol sa press conference didto sa Davao City kapin sa semana na ang nakalabay dihang gipangutana siya bahin sa mga kaso sa pagpatay sa mga sakop sa media dinhi sa nasud.

Apan si Duterte miklaro nga dili kadto maoy buot niyang ipasabot ug wa siya moendorsar nga patyon ang mga mediamen nga kurakot.

Apan lahi ang pagsabot sa mga sakop sa media nga nitambong sa gisulti ni Duterte nga alang kaniya simple ug direktang tubag nga gibulakbulakan lang og pamalikas ug body language.

Tungod ba kaha niadto nga kinaiya hinungdan nga daghan na hinuon og interpretasyon ang iyang gipamulong mao nga lain ang pagsabot sa mga tawo?

Mahimong sabton nga daw iyang giendorsar ang pagpatay ug mahimo sab sabton nga wala niya giendorsar ang pagpatay sa mga sakop sa media.

Si Duterte misaad nga usbon niya ang iyang kinaiya sa higayon nga pormal na siyang magsugod sa iyang opisina karong Hunyo 30. Kun mahimo pa lang, maayong paspasan ang pagpakli sa mga adlaw.

Maayo kun mao na, kay samtang nagkadugay, nagkadaghan ang kontra ni Duterte bisan wa pa gani kini makalingkod sa pwesto.  Dili makaayo sa Pilipinas nga lakip ang UN, mga konserbatibo ug mga kaalyado niining mga nasud, mangasuko sa paturagas niyang mga pamahayag nga adunay daghang interpretasyon.